| 章節 | 現代台語漢字2021版經文 |
| 13:1 | 撒種籽的譬喻 ( 可 4:1-9 路 8:4-8 ) 像彼日，耶穌對厝裡出去，佇湖邊坐。 |
| 13:2 | 有一大陣人聚集倚來伊遐，伊煞著去坐佇船頂，歸大陣人攏徛佇岸頂。 |
| 13:3 | 伊就用譬喻對𪜶講真多項事。伊講： 「有一個撒種籽的人出去撒種籽。 |
| 13:4 | 伊撒的時，有的種籽落佇路邊，鳥仔飛來，給𪜶食了了。 |
| 13:5 | 有的落佇石頭地，土少的所在，因為土無深，真緊就茁芽； |
| 13:6 | 不過日頭一下出，給𪜶曝著，因為無根就焦去。 |
| 13:7 | 有的落佇莿內，刺仔大欉起來就給𪜶翕死。 |
| 13:8 | 不過有的落佇好土地，就結實；有的一百倍，有的六十倍，有的三十倍。 |
| 13:9 | 有耳孔的，著聽！」 |
| 13:10 | 譬喻的目的 ( 可 4:10-12 路 8:9-10 ) 門徒來問耶穌：「是按怎你對群眾攏用譬喻給𪜶講？」 |
| 13:11 | 耶穌應講：「天國的奧祕已經有互恁知，毋拘無互𪜶知。 |
| 13:12 | 因為有的，欲互伊閣較多，多到有賰；無的，連伊所有的嘛欲給伊搶起來。 |
| 13:13 | 為著此個緣故，我用譬喻對𪜶講，因為：
𪜶看嘛看無， 聽嘛聽無，閣𣍐了解。 |
| 13:14 | 以賽亞的預言抵佇𪜶身上應驗：
恁聽閣聽嘛𣍐了解； 恁看閣看嘛𣍐看見。 |
| 13:15 | 因為此個子民的心已經鈍，
耳孔重， 目睭瞌。 若毋是按呢，𪜶的目睭會看見， 耳孔會聽見， 心會明白，會回心轉意， 我就給𪜶醫好。 |
| 13:16 | 「毋拘恁真有福氣，因為恁目睭有看見，耳孔有聽見。 |
| 13:17 | 我實在給恁講，以前有真多先知及義人愛欲看恁所看見的亦無看著，欲聽恁所聽見的亦無聽著。」 |
| 13:18 | 耶穌解說撒種籽的譬喻 ( 可 4:13-20 路 8:11-15 ) 「所以，恁著注意聽此個撒種籽的譬喻。 |
| 13:19 | 所有聽著天國的信息無明白的，是親像撒佇路邊的種籽，彼個邪惡者來，給撒佇伊心內的種籽搶去。 |
| 13:20 | 撒佇石頭地的，是指人聽著信息，隨時歡喜接受， |
| 13:21 | 毋拘佇伊的心內釘根無深，擋𣍐久，一下為著信息抵著患難抑是迫害，隨時就放拺。 |
| 13:22 | 撒佇莿內的，是指人聽著信息了後，生活的掛慮及錢財的迷惑給所聽著的信息翕死，煞𣍐結實。 |
| 13:23 | 撒佇好土地的，是指人聽著信息，有了解，真正有結實；有的一百倍，有的六十倍，有的三十倍。」 |
| 13:24 | 稗仔的譬喻 耶穌閣對𪜶講一個譬喻：「天國通譬喻做有一個人撒好種籽佇家己的園裡。 |
| 13:25 | 人啲睏的時，對敵來，將稗仔撒佇麥仔的中間，就離開。 |
| 13:26 | 麥仔發起來，出穗的時，稗仔嘛發出來。 |
| 13:27 | 僕人來見主人講：『頭家，你豈毋是撒好的種籽佇園裡？哪會有諸個稗仔？』 |
| 13:28 | 主人應講：『這是對敵做的。』僕人講：『按呢，阮來去給許個稗仔摳起來好無？』 |
| 13:29 | 主人應講：『毋通，恁摳稗仔的時，毋抵好連麥仔煞摳摳起來。 |
| 13:30 | 互稗仔及麥仔同齊大欉，收成的時我才吩咐收割的人先給稗仔摳起來，捆歸把去燒，然後給麥仔收入去我的倉庫。』」 |
| 13:31 | 芥菜籽的譬喻 ( 可 4:30-32 路 13:18-19 ) 耶穌閣給𪜶講一個譬喻：「天國親像一粒芥菜籽，人給伊提去撒佇家己的園裡。 |
| 13:32 | 芥菜籽是所有種籽中上細粒的，大欉起來，比所有的菜蔬閣較大欉，成做一欉樹，連空中的鳥仔都來佇樹枝做巢。」 |
| 13:33 | ( 路 13:20-21 ) 耶穌閣給𪜶講一個譬喻：「天國親像酵母，有一個婦仁人提去濫佇三斗麵粉做夥抄，最後歸個攏發起來。」 |
| 13:34 | 耶穌用譬喻教示 ( 可 4:33-34 ) 諸個一切的教示耶穌攏用譬喻對眾人講；伊無用別款的方式，只有用譬喻對𪜶講。 |
| 13:35 | 伊按呢做是欲應驗主通過先知所講的話：
我欲開嘴講譬喻， 講創世以來隱密的事。 |
| 13:36 | 解說稗仔的譬喻 耶穌離開眾人，入去厝內。伊的門徒來給伊講：「請給阮解說園裡的稗仔的譬喻。」 |
| 13:37 | 耶穌應講：「彼個撒好種籽的是人子； |
| 13:38 | 園是世界；好種籽是天國的子兒；稗仔是彼個邪惡者的子兒； |
| 13:39 | 撒稗仔彼個敵人是魔鬼；收割是指今世的終局；收割的是天使。 |
| 13:40 | 佇今世的終局，歹人會親像稗仔互人拾歸把用火給𪜶燒。 |
| 13:41 | 人子會差伊的天使來，對伊的國內將一切互人跋倒犯罪及不法的人攏掠來， |
| 13:42 | 給𪜶㧒落火爐，佇遐𪜶會啼哭，咬牙切齒。 |
| 13:43 | 彼時，義人佇𪜶的父的國度會親像日頭發光。有耳孔的，著聽！」 |
| 13:44 | 寶貝及真珠的譬喻 「天國親像寶貝藏佇園裡，有人尋著，給伊蓋起來，真歡喜去賣一切所有的來買彼坵園。 |
| 13:45 | 「天國嘛親像一個生理人啲尋媠的真珠。 |
| 13:46 | 伊一下尋著一粒真值錢的真珠，就去賣一切所有的來買彼粒真珠。」 |
| 13:47 | 拋網的譬喻 「天國嘛親像人佇湖裡拋網，掠逐款魚； |
| 13:48 | 網滿就拖上岸，坐落來，揀好的囥落去桶仔內，僫的㧒确。 |
| 13:49 | 今世的終局嘛親像按呢；天使欲出去，對義人的中間給歹人分別出來， |
| 13:50 | 㧒落火爐；佇遐𪜶會啼哭，咬牙切齒。」 |
| 13:51 | 新及舊的教示 耶穌問伊的門徒講：「諸個恁攏有明白無？」 𪜶應講：「有。」 |
| 13:52 | 伊就給𪜶講：「所以，逐個學習天國道理的經學教師，親像一家的主人對倉庫給新及舊的物件攏搬出來。」 |
| 13:53 | 耶穌佇拿撒勒受拒絕 ( 可 6:1-6 路 4:16-30 ) 耶穌講諸個譬喻了後離開遐， |
| 13:54 | 倒去家己的故鄉。伊佇𪜶的會堂教示人，𪜶攏真著驚，講：「此個人對叨位得著此款的智慧及行神跡的氣力？ |
| 13:55 | 伊豈毋是彼個木匠的子？伊的老母豈毋是叫做馬利亞？伊的兄弟豈毋是雅各、約瑟、西門，及猶大？ |
| 13:56 | 伊的小妹豈毋是攏及咱佇遮？按呢，此個人對叨位得著此款的智慧及氣力？」 |
| 13:57 | 𪜶煞對耶穌起反感。 耶穌給𪜶講：「先知佇家己的故鄉家己的家族以外，一定會受尊重。」 |
| 13:58 | 因為𪜶毋信，耶穌佇遐無行真多神跡。 |