| 章節 | 現代台語漢字2021版經文 |
| 11:1 | 暴君的衰敗 黎巴嫩，拍開你的門， 互火燒你的柏香樹。 |
| 11:2 | 松樹啊，大聲哮，
因為柏香樹已經倒落去， 媠的樹已經倒壞。 巴珊的橡樹，大聲哮， 因為茂盛的樹林已經剉了了。 |
| 11:3 | 聽咧，有牧者啲哀呻，
因為青翠的草埔受毀壞。 聽咧，有猛獅噤噤哮， 因為約旦河邊的樹林已經荒廢。 |
| 11:4 | 兩個牧者 上主 — 我的上帝按呢講：「著牧養欲互人刣的羊群， |
| 11:5 | 因為給𪜶買去刣的人無想講家己有罪；賣𪜶的講『著稱讚上主，因為我好額啦』；連𪜶的牧者嘛無可憐𪜶。」 |
| 11:6 | 上主閣講：「我𣍐閣憐憫此所在的住民。我欲給𪜶攏交互隔壁國及𪜶的統治者，互𪜶來毀滅此個地；我嘛無欲救𪜶脫離對敵的手。」 |
| 11:7 | 對按呢，我牧養欲互人刣的羊群，特別是羊群中上困苦的。我提兩支柺仔牧養諸個羊群，一支叫做「恩惠」，一支叫做「聯合」。 |
| 11:8 | 一月日內，我開除三個牧者，因為我𣍐當閣容忍𪜶，𪜶嘛討厭我。 |
| 11:9 | 我講：「我無欲牧養恁。啲欲死的出在伊死；欲滅亡的，出在伊滅亡；賰的，互𪜶互相吞食。」 |
| 11:10 | 我就遏折彼支叫做「恩惠」的柺仔，表示上主廢除及萬民所立的約。 |
| 11:11 | 彼日，此個約就廢除。許個啲仰望我的上困苦的羊群，就知這是上主的信息。 |
| 11:12 | 我對𪜶講：「恁若同意，就互我工錢；若無，就煞。」𪜶就算互我三十個銀仔做我的工錢。 |
| 11:13 | 這是𪜶所估計的好價數。上主給我講：「將銀仔㧒互燒瓷人。」我就提彼三十個銀仔佇上主的聖殿㧒互燒瓷人。 |
| 11:14 | 我閣遏折叫做「聯合」的第二支柺仔，表示猶大及以色列的兄弟關係已經切斷。 |
| 11:15 | 上主閣給我講：「著給彼個無路用的牧者所用的器具提起來。 |
| 11:16 | 我欲佇此個國家興起一個牧者。啲欲死的，伊無看顧；失迷的，伊無抄尋；受傷的，伊無醫治；勇壯的，伊無養飼；干焦欲食肥羊的肉，拆裂𪜶的蹄。
|
| 11:17 | 放拺羊群，無路用的牧者，慘啊！
伊的手骨會互刀刣，瘸去； 正目互刀傷，失明。」 |