| 章節 | 現代台語漢字2021版經文 |
| 9:1 | 審判隔壁國 下面是上主有關哈得拉地區及大馬士革的信息： 世間人，特別是以色列逐個支族，𪜶的目睭攏注目啲看上主； |
| 9:2 | 附近的哈馬，甚至真巧的泰爾及西頓嘛按呢。 |
| 9:3 | 泰爾為著家己起造堡壘，囤積銀親像囤積土沙，積聚金多甲親像街路的土糜。 |
| 9:4 | 毋拘，主一定會將伊所有的剝了了，嘛會拍敗伊海上的勢力，燒毀伊的城。 |
| 9:5 | 亞實基倫看著就驚惶；迦薩驚甲皮皮惙；以革倫的向望會落空。迦薩𣍐閣再有君王；亞實基倫𣍐閣再有人徛起。 |
| 9:6 | 混雜的種族會來亞實突定居。我欲除滅非利士人的驕傲。 |
| 9:7 | 我欲互𪜶無閣食含血的肉，嘴內無閣有𣍐用得食的食物。非利士所賰的人會歸順咱的上帝，親像猶大的一個宗族；以革倫人會親像耶布斯人。 |
| 9:8 | 我欲紮營保護我的家園，無互對敵侵犯；侵略者𣍐閣來攻擊，因為我現在親身啲顧守。 |
| 9:9 | 將來的君王 錫安的子民啊，著歡喜快樂！ 耶路撒冷的子民啊，著歡呼！ 你看，你的君王來啦！ 伊勝利凱旋； 伊謙遜騎驢，就是騎驢仔子。 |
| 9:10 | 我欲除去以色列的戰車，
除滅耶路撒冷的戰馬， 遏折交戰的弓。 伊欲對列國宣布和平。 伊的統治會對此個海到彼個海， 對幼發拉底河直到地極。 |
| 9:11 | 上帝子民的復興 錫安啊，因為我有用血及你立約， 我欲給恁諸個受掠的人 對無水的深坑解救出來。 |
| 9:12 | 恁諸個受掠猶有向望的人啊，
著倒轉來，轉來恁的堡壘。 我今仔日宣布：我欲加倍補償恁。 |
| 9:13 | 我欲用猶大做我的弓，
用以色列做安佇弓的箭。 錫安啊，我欲激動你的子民， 互𪜶做我的刀劍攻擊希臘人。 |
| 9:14 | 上主欲出現佇伊子民的頂面；
伊的箭欲親像熠爁射出； 至高的上主欲歕哨角， 坐捲螺仔風對南旁來進攻。 |
| 9:15 | 上主 — 萬軍的統帥欲保護伊的子民；
𪜶會吞滅挕石頭的對敵， 會歡呼親像酒醉的人大聲喝； 𪜶會互對敵的血流甲親像獻祭的血， 對祭壇的四角頭溢出來。 |
| 9:16 | 彼日，上主 — 𪜶的上帝欲救𪜶，
親像牧者解救羊群； 𪜶會親像王冠的寶石佇伊的地發光。 |
| 9:17 | 赫呢好！
赫呢媠！ 上主賜五穀互少男勇壯， 賜新酒互少女美麗。 |