| 章節 | 現代台語漢字2021版經文 |
| 7:1 | 責備虛假的禁食 大流士做波斯皇帝第四年九月，就是基斯流月初四，上主對撒迦利亞講話。 |
| 7:2 | 彼時，伯特利人已經差沙利色及利堅‧米勒，以及隨𪜶的人去懇求上主施恩。 |
| 7:3 | 𪜶問上主 — 萬軍的統帥聖殿的祭司以及先知講：「真多年來，阮佇五月攏有啲哀傷禁食，現在豈著閣按呢做？」 |
| 7:4 | 上主 — 萬軍的統帥對我講： |
| 7:5 | 「你著給此所在的人民及祭司講：『恁七十年久，佇五月、七月哀傷禁食，豈真正是為著我？ |
| 7:6 | 恁食恁飲，豈毋是為著恁家己？ |
| 7:7 | 耶路撒冷及周圍的城人口多閣繁榮，南旁的曠野及西旁的山埔有人徛起的時，上主交代以前的先知宣揚的，豈毋是像款諸個話？』」 |
| 7:8 | 背逆致到流放 上主閣對撒迦利亞講： |
| 7:9 | 「上主 — 萬軍的統帥有按呢講：『恁審判著照真實公正；著用慈愛憐憫相對待。 |
| 7:10 | 毋通欺負孤兒、寡婦、住佇恁中間的外族人，及散赤人；毋通計謀歹代，互相陷害。』 |
| 7:11 | 「毋拘𪜶越轉身，毋肯聽趁， |
| 7:12 | 閣互家己的心硬甲親像鑽石赫呢碇，毋肯聽趁律法，毋聽我上主 — 萬軍的統帥通過伊的神差遣以前的先知傳達的話；所以，我上主 — 萬軍的統帥發大受氣， |
| 7:13 | 因為我有叫，𪜶毋聽。我上主 — 萬軍的統帥講：『按呢，𪜶求叫，我嘛毋聽。 |
| 7:14 | 我欲用捲螺仔風給𪜶吹散，吹去𪜶毋識的列國遐。𪜶離開了後，此個地就荒廢，無人出入；𪜶互肥媠的地變做荒埔。』」 |