| 章節 | 現代台語漢字2021版經文 |
| 6:1 | 戰車的異象 我閣攑頭看，看見有四台戰車對兩座銅山的中間出來。 |
| 6:2 | 頭一台是紅馬啲拖，第二台烏馬， |
| 6:3 | 第三台白馬，第四台花斑的馬啲拖。 |
| 6:4 | 我就問及我講話的使者：「先生，諸個啲表示什麼？」 |
| 6:5 | 使者應我講：「諸個啲表示天四面的風；𪜶啲侍候全地的主，今對遐出來。」 |
| 6:6 | 烏馬拖的車向北旁去；白馬的車隨佇後面；花斑馬向南旁去。 |
| 6:7 | 諸個勇的馬出去，急欲行透全地。使者講：「恁去全地巡邏。」𪜶就去。 |
| 6:8 | 伊叫我，給我講：「你看，向北旁去的已經佇北旁，互我的心平靜。」 |
| 6:9 | 為耶書亞戴禮冠 上主對我講： |
| 6:10 | 「你著將許個流放去巴比倫倒轉來的黑玳、多比雅，及耶大雅所獻的金銀，隨時提去西番雅的子約西亞的厝， |
| 6:11 | 用許個金銀做禮冠，戴佇約薩達的子大祭司耶書亞的頭殼頂； |
| 6:12 | 對伊講：『上主 — 萬軍的統帥按呢講：看咧，有一個稱做新芛的欲對伊的本所在茁出來；伊欲起造上主的殿。 |
| 6:13 | 就是伊，欲起造上主的殿。伊欲有王的尊榮，坐王位統治；閣會有一個祭司佇伊的寶座邊。𪜶兩個人中間有和諧共識。 |
| 6:14 | 此頂禮冠欲下佇上主的殿來記念黑玳、多比雅、耶大雅，及西番雅的子 — 約西亞。』」 |
| 6:15 | 住佇真遠的人嘛會來做夥重建上主的殿。彼時恁就會知，是上主 — 萬軍的統帥差我來恁遮。恁若誠心聽趁上主 — 恁的上帝的話，此個代誌一定實現。 |