| 章節 | 現代台語漢字2021版經文 |
| 5:1 | 啲飛的冊的異象 我閣攑頭看見有一卷啲飛的冊。 |
| 5:2 | 使者問我：「你看著什麼？」 我應講：「我有看著一卷啲飛的冊，長九公尺，闊四公尺半。」 |
| 5:3 | 伊就對我講：「此個是對全地發出的咒詛；所有偷提的會照此卷冊的此面所寫的給𪜶除滅；所有作偽證的會照另外彼面所寫的給𪜶除滅。 |
| 5:4 | 上主 — 萬軍的統帥有講：我欲送彼卷冊出去，彼卷冊會入去許個偷提的人及指我的名濫糝咒誓的人的厝，會留佇𪜶遐，直到歸間厝連柴及石攏毀壞。」 |
| 5:5 | 及我講話的使者出來給我講：「你著攑頭看，看有出現什麼？」 |
| 5:6 | 我問：「這是什麼？」 伊講：「是量五穀的桶仔。」 伊閣講：「此個桶仔表示此個地攏總的人的罪。」 |
| 5:7 | 看咧，圓的鉛蓋一下掀開，有一個婦仁人坐佇內面。 |
| 5:8 | 使者講：「此個婦仁人表示邪惡。」伊就將彼個婦仁人扼落去桶仔內，閣用彼個鉛蓋蓋啲。 |
| 5:9 | 我閣攑頭看，看著兩個婦仁人出現；𪜶有親像鶴的翼。𪜶搋翼順風飛來，將桶仔夯到半空中。 |
| 5:10 | 我問及我講話的使者：「𪜶欲給桶仔夯去叨位？」 |
| 5:11 | 伊給我講：「欲夯去巴比倫，佇遐給伊起一間廟；等廟起好，就給此個桶仔下佇遐。」 |