| 章節 | 現代台語漢字2021版經文 |
| 27:1 | 祭壇 ( 出 38:1-7 ) 「你著用金合歡木做祭壇，長及闊攏兩公尺二十公分，是四方的；高一公尺三十公分。 |
| 27:2 | 著佇壇的四角頭做四支翹起來的角，及壇連做夥；歸座祭壇著用銅包啲。 |
| 27:3 | 著做收祭物的灰的桶，閣做托仔、碗、肉叉、火鼎；壇的器具攏著用銅做。 |
| 27:4 | 著為祭壇做一個銅的網，網的四角頭做四個銅環。 |
| 27:5 | 網安佇祭壇四面圍腰板的下半旁，互網對壇的半腰伸到下底。 |
| 27:6 | 著用金合歡木給祭壇做槓，用銅包啲。 |
| 27:7 | 槓著穿佇祭壇雙旁的環內面，通扛祭壇。 |
| 27:8 | 著用枋做祭壇，中央空殼，攏著照我佇山頂指示你的款式。」 |
| 27:9 | 會幕的埕 ( 出 38:9-20 ) 「你著用挲過的幼麻給會幕圍一個埕；南旁的帷長四十四公尺。 |
| 27:10 | 埕的南旁著有二十支柱，二十個有榫孔的銅座；柱的鉤仔及橫杆攏著用銀做。 |
| 27:11 | 埕的北旁嘛著有帷，長四十四公尺，柱二十支，銅座二十個；柱的鉤仔及橫杆攏著用銀做。 |
| 27:12 | 埕的西旁著有帷，闊二十二公尺，柱十支，銅座十個。 |
| 27:13 | 埕東旁的帷闊二十二公尺； |
| 27:14 | 入口的雙旁，帷的長攏著六公尺六十公分，吊帷的柱各三支，有榫孔的銅座各三個。 |
| 27:15 | 併於上節 |
| 27:16 | 埕的入口著有門簾，闊九公尺，用藍色、紫色、朱紅色的紗，及挲過的幼麻，用刺繡的手路繡的；柱四支，座四個。 |
| 27:17 | 埕四圍所有的柱，攏著用銀的橫杆連接起來；用銀做鉤仔，用銅做座。 |
| 27:18 | 埕的長四十四公尺，闊二十二公尺，高兩公尺二十公分；帷著用挲過的幼麻做，座攏著用銅做。 |
| 27:19 | 會幕敬拜用的器具及所有的杙仔，以及埕所有的杙仔，攏著用銅做。」 |
| 27:20 | 點燈的條例 ( 利 24:1-4 ) 「你著吩咐以色列人，將掙出來上好的橄欖油提來互你，做點燈的路用，互會幕的燈不時點啲。 |
| 27:21 | 亞倫及伊的子著佇會幕內面約櫃前的帳簾外，對下昏到早起，佇上主面前照顧管理燈火。這欲做以色列人代代著守的規例。」 |