| 章節 | 現代台語漢字2021版經文 |
| 4:1 | 金燈台的異象 彼個及我講話的使者閣倚來，給我叫醒，親像給啲睏的人叫精神。 |
| 4:2 | 伊問我：「你看著什麼？」 我講：「我有看著一座金燈台，台頂有一個貯油的盆，盆頂有七支燈，逐支燈有七個燈心。 |
| 4:3 | 燈台邊有兩欉橄欖樹，一欉佇油盆的正旁，一欉佇倒旁。」 |
| 4:4 | 我問及我講話的天使：「先生，諸個啲表示什麼？」 |
| 4:5 | 伊應我講：「你毋知諸個是什麼意思噢？」 我講：「先生，我毋知。」 |
| 4:6 | 伊給我解說：「上主吩咐所羅巴伯的話是按呢：『毋是靠權力，毋是靠才能，著靠我的神。』上主 — 萬軍的統帥按呢宣布。 |
| 4:7 | 大山啊，你算什麼？你會佇所羅巴伯面前變做平地。伊給上重要的石搬出來的時，眾人會喝講：『上帝賜福！上帝賜福！』」 |
| 4:8 | 上主有閣對我講， |
| 4:9 | 所羅巴伯有給此間聖殿下地基，嘛欲親手完成重建的工作。彼時恁就知上主 — 萬軍的統帥有差我來恁遮。 |
| 4:10 | 啥人敢藐視此日，看欲發生的代誌做小事？𪜶一下看著所羅巴伯手閣提墜繩會真歡喜。此七支燈是上主啲巡視全地的目睭。 |
| 4:11 | 我閣問彼個使者：「此個燈台雙旁的兩欉橄欖樹啲表示什麼？ |
| 4:12 | 橄欖樹的兩支樹椏的邊仔，有兩條金的管流出金色的油，啲表示什麼？」 |
| 4:13 | 伊應講：「你毋知諸個是什麼意思噢？」 我講：「先生，我毋知。」 |
| 4:14 | 伊講：「這是兩個受抹油揀選的僕人，啲侍候全地的主。」 |