| 章節 | 現代台語漢字2021版經文 |
| 2:1 | 量索的異象 我閣攑頭看，看見一個人手提量索。 |
| 2:2 | 我問伊：「你欲去叨位？」 伊給我講：「欲去量耶路撒冷，看伊偌闊、偌長。」 |
| 2:3 | 後來，及我講話的使者出去，閣有一個使者來接伊， |
| 2:4 | 對伊講：「你趕緊去給彼個少年人講：『耶路撒冷欲成做無牆的城，人及牲生揢甲滿滿。』 |
| 2:5 | 上主講：『我欲用火做牆四面包圍保護伊，閣我的榮光欲臨在佇彼內面。』」 |
| 2:6 | 呼召受掠的倒轉來 上主講：「走，緊走，對北方的地逃走轉來！因為我以前有給恁趕散去全地逐所在。 |
| 2:7 | 走，住佇巴比倫的錫安子民，緊走噢！」 |
| 2:8 | 上主 — 萬軍的統帥顯出榮光了後，差我去搶掠伊的子民的列國遐，講：「磕著我的子民，就是磕著我的目睭仁。 |
| 2:9 | 我欲下手攻擊𪜶，𪜶會互𪜶的奴隸搶。」彼時恁就會知，是上主 — 萬軍的統帥差我來。 |
| 2:10 | 上主閣講：「錫安的子民，著歡喜唱歌！恁看，我欲來，欲𫢶佇恁中間。 |
| 2:11 | 彼日，有真多國會來歸倚上主，做我的子民。我欲𫢶佇恁中間。」按呢，恁就會知，是上主 — 萬軍的統帥差我來恁遮。 |
| 2:12 | 上主欲得著猶大做伊佇聖地的產業；伊欲閣揀耶路撒冷做伊的城。 |
| 2:13 | 所有的人佇上主面前攏著肅靜，因為上主對伊的聖所徛出來。 |