| 章節 | 現代台語漢字2021版經文 |
| 3:1 | 耶路撒冷的罪惡及救贖 此個背逆、污穢、欺壓的城，慘啊！ |
| 3:2 | 伊無聽話，
無受教示， 無倚靠上主， 無親近伊家己的上帝。 |
| 3:3 | 伊的貴族佇城內是噤噤哮的獅；
伊的審判官是暝時的豺狼， 連一塊仔骨頭都無留到天光。 |
| 3:4 | 伊的先知講話無負責，作人詭詐；
伊的祭司拍垃墋聖所，濫用律法。 |
| 3:5 | 佇𪜶中間的上主是公義的，
無做不義的事。 伊逐早起施行審判，暝日無停； 毋拘不義的人毋知見笑。 |
| 3:6 | 上主講：
「我已經消滅列國， 毀壞𪜶城角的塔； 我互𪜶的街路冷冷清清， 無人經過； 𪜶的城荒廢，無人留佇遐， 攏無人徛起。 |
| 3:7 | 我講：『你應該著敬畏我，
著受教示， 才免城內的厝照我的判定受剿滅。』 毋拘𪜶顛倒不斷做敗壞的代誌。」 |
| 3:8 | 上主閣講：
「所以，恁著聽候我， 到我起來控告列國彼日； 因為我已經決定欲召集列國， 聚集列邦， 將我的大受氣對𪜶摒落； 全地一定會互我猛烈受氣的火吞滅。 |
| 3:9 | 「彼時我欲潔淨萬民的嘴唇，
互𪜶通求叫上主的名， 同心一意服事我。 |
| 3:10 | 我拍散的子民會對古實的河彼旁轉來，
對我祈禱獻禮物。 |
| 3:11 | 「佇彼日，恁𣍐閣因為一切得罪我的事見笑；
彼時我欲對恁中間除去誇口驕傲的人， 恁就𣍐閣佇我的聖山自高。 |
| 3:12 | 我會留散赤卑微的人佇恁中間，
𪜶會倚靠我上主得著保護。 |
| 3:13 | 以色列所賰的子民𣍐閣做歹，
𣍐閣講白賊， 嘴內無詭詐的舌； 𪜶會好食好睏， 𣍐閣互人嚇驚。」 |
| 3:14 | 快樂的歌 錫安啊，著歡喜唱歌！ 以色列啊，著大聲歡呼！ 耶路撒冷啊，著滿心歡喜快樂！ |
| 3:15 | 上主已經撤銷對你的審判，
將你的對敵趕走。 上主 — 以色列的王及你同在； 你免閣驚災害。 |
| 3:16 | 佇彼日，人會對耶路撒冷講：
「錫安啊，毋通驚！ 毋免腳痠手軟。 |
| 3:17 | 上主 — 你的上帝及你同在；
伊有大氣力施行拯救， 伊會因為你歡喜快樂， 伊會因為疼你，互你的性命換新， 閣因為你，歡喜唱歌。」 |
| 3:18 | 上主講：
「我欲聚集許個因為𣍐當守節心艱苦的人， 互𪜶免閣擔受凌辱的重擔。 |
| 3:19 | 彼時，我欲刑罰欺壓恁的，
解救腳跛的， 聚集受放逐的。 我欲互許個佇逐所在受凌辱的， 得著稱讚及尊榮。 |
| 3:20 | 彼時，我欲給恁聚集，導恁轉來。
我互恁諸個受掠的人回復繁榮的時， 恁會親目看著恁佇地上萬民的中間 得著稱讚及尊榮。」 上主按呢宣布。 |