| 章節 | 現代台語漢字2021版經文 |
| 1:1 | 亞們的子約西亞作猶大王的時，上主對希西家的元孫，亞瑪利雅的曾孫，基大利的孫，古示的子西番雅講諸個話。 |
| 1:2 | 上主審判的日 上主講： 我欲對地上徹底除滅萬物。 |
| 1:3 | 我欲除滅人及牲生，
除滅空中的鳥及海裡的魚。 我欲互歹人跋倒𣍐閣起來， 欲對地上毀滅全人類。 上主按呢宣告。 |
| 1:4 | 我欲伸手攻擊猶大，
攻擊耶路撒冷所有的住民。 我嘛欲對此個所在毀滅猶啲拜巴力的人， 以及服事偶像的祭司。 |
| 1:5 | 所有佇厝頂拜天頂萬象的，
及許個敬拜上主指我咒誓，像時閣指神明米勒公咒誓的， |
| 1:6 | 以及背叛上主，無尋求我，無求我幫贊的人，
我攏欲給𪜶毀滅。 |
| 1:7 | 你著佇至高上主的面前肅靜，
因為上主的日啲欲到啦。 上主已經準備欲犧牲伊的子民， 欲叫對敵來吞食猶大。 |
| 1:8 | 上主講：
「佇獻祭的日， 我欲刑罰貴族及王的眾子， 以及攏總穿外邦人的衫的。 |
| 1:9 | 彼日，我欲刑罰一切迒過戶橂，
互主人的厝充滿強暴及詭詐的人。」 |
| 1:10 | 上主講：
「彼日，佇魚門有喝咻， 佇新的城區有哀哭， 對山頂有山崩的聲發出。 |
| 1:11 | 住佇低的城區的人啊，著哀叫，
因為生理人攏會消滅， 用銀買賣的有錢人攏會受剿滅。 |
| 1:12 | 彼時我欲佇耶路撒冷攑燈抄尋；
我欲刑罰許個自滿自大的人， 𪜶想講『上主𣍐賜福，嘛𣍐降災』。 |
| 1:13 | 𪜶的財物會互人搶去，
𪜶的厝宅會荒廢； 𪜶起厝，𣍐當住； 栽種葡萄，嘛無酒通飲。」 |
| 1:14 | 上主的大日子近啦，
真近，連鞭就到。 聽咧，上主的日是痛苦的日， 勇士都會艱苦哀叫。 |
| 1:15 | 彼日是上主大受氣的日，
患難困苦的日， 大災難青凊的日， 烏烏暗暗的日， 烏雲蓋密的日， |
| 1:16 | 歕哨角哄喝的日；
對敵欲攻擊堅固的城， 攻擊城角的高塔。 |
| 1:17 | 我欲互人抵著困苦，
互𪜶親像失明的人行路， 因為𪜶得罪上主； 𪜶的血會受摒出親像啲摒土粉， 腸仔腸肚互人㧒确親像啲㧒糞埽。 |
| 1:18 | 上主大受氣的日，人的金銀𣍐當救𪜶。
全地會互上主猛烈受氣的火吞滅， 因為伊會真緊剿滅地上所有的住民。 |