| 章節 | 現代台語漢字2021版經文 |
| 2:1 | 上主回答 我欲𬦰上守望台， 徛佇堡壘頂觀看， 聽候上主對我講什麼， 看伊欲按怎應答我的埋怨。 |
| 2:2 | 上主應我講：
「將此個啟示寫落來， 清楚刻佇版裡， 互人一下看就明白。 |
| 2:3 | 此個啟示啲聽候指定的時間；
時間一下到，所講的結局就會實現。 指定的時間雖然感覺較慢，猶久著等， 因為一定會來，𣍐延遲。 |
| 2:4 | 你看，心無正直的人自高自大，
毋拘義的人會對信來活。」 |
| 2:5 | 不義的結局 財富會迷惑人，互人驕傲， 貪慾親像陰府填𣍐淀； 伊的心親像死亡𣍐滿足， 想欲征服萬國，互萬民攏歸順伊。 |
| 2:6 | 受征服的人會用俗語譬喻給伊譏刺睥相講：
「你慘啊！ 你囤積偷提來的物件， 用別人的抵押賺大錢， 你做此款歹代欲到底時？」 |
| 2:7 | 互你剝削的人豈𣍐忽然興起？
𪜶豈𣍐興旺互你皮皮惙？ 彼時你會變做𪜶的獵物。 |
| 2:8 | 你有搶劫真多國家，
列國中所賰的人嘛會給你搶； 因為你有流人的血， 毀滅境內的城市及內面的住民。 |
| 2:9 | 為家己的家積聚不義的錢財，
佇高的所在作巢向望脫離災難， 此款人慘啊！ |
| 2:10 | 你計謀欲毀滅真多國的人民，
煞互你的家受恥辱， 害著家己的性命， |
| 2:11 | 連壁的石都會喉叫，
厝的樑嘛會應聲。 |
| 2:12 | 用刣人流血建造城，
用罪過建立城市， 此款人慘啊！ |
| 2:13 | 你看，人民勞碌得著的互火燒去，
列國拖磨得著的攏落空， 這豈毋是上主 — 萬軍的統帥的作為？ |
| 2:14 | 全地欲充滿對上主榮光的認識，
親像水充滿海洋。 |
| 2:15 | 互厝邊飲酒，飲甲醉茫茫，
通看𪜶赤身露體， 此款人慘啊！ |
| 2:16 | 你得著的毋是尊榮，是極大的凌辱。
今換你飲，飲甲東倒西歪。 上主大受氣的杯會輪到你遐， 你的榮光會變做見笑。 |
| 2:17 | 你有對黎巴嫩做兇暴的事，
你會受較大的兇暴； 野獸抵著的毀滅， 會互你驚惶。 你一定會受報應， 因為你有流人的血， 毀滅境內的城市及內面的住民。 |
| 2:18 | 雕刻的像是人造的，有什麼利益？
鑄造的偶像教人虛假，有什麼路用？ 師傅倚靠家己所造的， 伊造的不過是𣍐講話的偶像。 |
| 2:19 | 對柴頭講「醒起來」，
對𣍐講話的石頭講「𬦰起來」， 此款人慘啊！ 偶像豈會教示人？ 你看，偶像不過是用金用銀包的， 內面攏無性命。 |
| 2:20 | 上主佇伊的聖殿，
全地佇伊的面前攏著肅靜。 |