| 章節 | 現代台語漢字2021版經文 |
| 1:1 | 下面是有關尼尼微的宣告，就是伊勒歌斯人那鴻所看見的異象的記錄。 |
| 1:2 | 上主對尼尼微發受氣 上主是要求專情，閣是會報復的上帝； 上主會報復，會發大受氣。 上主會報復伊的對敵， 對伊的敵人發大受氣。 |
| 1:3 | 上主𣍐快受氣，毋拘有大氣力；
伊一定𣍐給有罪的判做無罪。 上主經過的路會絞捲螺仔風，會起狂風； 雲是伊的腳絞起來的土粉。 |
| 1:4 | 伊責備海，海就焦去，
所有的河攏無水。 巴珊及迦密的草攏焦去， 黎巴嫩的花嘛謝去。 |
| 1:5 | 大山因為上主振動，
小山消熔； 大地佇伊面前搖泏， 世界及𫢶佇彼中間的皮皮惙。 |
| 1:6 | 伊起受氣，啥人徛會牢？
伊發性地，啥人當會起？ 伊的大受氣親像火噴出； 石磐佇伊面前爆甲碎碎碎。 |
| 1:7 | 上主至善。
佇患難的日，伊是避難所； 伊照顧所有倚靠伊的人。 |
| 1:8 | 毋拘伊會用氾濫的大水毀滅尼尼微，
給對敵趕入烏暗。 |
| 1:9 | 恁無論設什麼計謀抵敵上主，
伊會徹底給恁剿滅； 恁𣍐當閣再背叛。 |
| 1:10 | 恁親像飲酒醉的人，
親像結歸球的莿， 閣親像焦去的麥稿會互火燒滅。 |
| 1:11 | 尼尼微啊，有一個人會對你遐出來，
圖謀邪惡，設計攻擊上主。 |
| 1:12 | 上主對猶大的子民講：
「亞述人雖然強閣多， 嘛會受毀滅消失。 我的子民啊，我曾互恁受苦， 毋拘以後𣍐閣互恁受苦。 |
| 1:13 | 現在我欲摃斷𪜶互恁的軛，
擦斷𪜶捆縛恁的索。」 |
| 1:14 | 上主對尼尼微宣告：
「你無閣有後代通延續你的名。 我欲對你的神廟除滅雕刻的偶像， 及鑄造的神像； 我欲給你準備墳墓， 因為你無閣有活啲的價值。」 |
| 1:15 | 看咧，傳報好消息，
宣布和平的人𬦰上山頂，講： 「猶大啊，著守節期，謝恁的願； 歹人𣍐閣侵犯恁， 𪜶會徹底受毀滅。」 |