| 章節 | 現代台語漢字2021版經文 |
| 7:1 | 以色列人的腐敗 我慘啊！我親像一個人， 熱天的果子收成了， 葡萄攏挽了， 尋無歸葩的葡萄通食， 連所愛頭水的無花果嘛尋無。 |
| 7:2 | 地上忠實的人攏消失，
世間無正直的人； 所有的人埋伏欲刣人， 逐個用羅網當伊的同胞。 |
| 7:3 | 𪜶的手專做歹代，
大臣及審判官討賄賂， 官員公然要求𪜶所愛的； 𪜶互相勾結，計謀做歹。 |
| 7:4 | 𪜶中間上好的，不過親像莿；
上正直的親像刺仔籬笆。 你的守望者所警告審判的日到啦， 混亂的日近啦。 |
| 7:5 | 毋通信任厝邊，嘛毋通倚靠朋友；
甚至對親密的某講話嘛著小心。 |
| 7:6 | 子藐視老父，
查某子及老母作對， 新婦忤逆大家； 人的對敵是家己家內的人。 |
| 7:7 | 毋拘我，我欲仰望上主，
欲聽候上帝 — 我的救主； 我的上帝會聽我的祈禱。 |
| 7:8 | 上主拯救伊的子民 我的對敵啊，免為著我的遭遇歡喜； 我雖然跋倒，嘛會閣起來； 我坐佇烏暗中，上主做我的光。 |
| 7:9 | 我著忍受上主的受氣，
因為我有得罪伊。 我欲聽候伊為著我的案件辯護， 為我主持公道。 伊會導我進入光明， 互我看著伊的公義。 |
| 7:10 | 彼時我的對敵看見，一定真見笑；
𪜶曾恥笑我講：「上主 — 你的上帝佇叨位？」 我會親目看見對敵親像街路的土糜受踐踏。 |
| 7:11 | 耶路撒冷的住民啊，重建城牆的日到啦；
彼日，恁會擴展恁的領土。 |
| 7:12 | 彼日，恁的同胞欲倒轉來，
對亞述到埃及， 對埃及到幼發拉底河， 對此個海到彼個海， 對此個山到彼個山， 𪜶攏欲倒轉來。 |
| 7:13 | 毋拘此個地，
會因為住民的歹行為變做荒廢。 |
| 7:14 | 上主憐憫伊的子民 上主啊，求你用你的柺牧養你家己的子民， 就是你的羊群，你的產業， 互𪜶𫢶佇有青翠草場包圍的樹林內，無受攪吵， 親像古早佇巴珊及基列按呢給𪜶牧養。 |
| 7:15 | 上主講：
「我欲親像導恁出埃及的日按呢， 顯出奇妙的神跡互恁看見。」 |
| 7:16 | 列邦看見，會因為家己的氣力見笑，
用手掩嘴，耳孔塞啲。 |
| 7:17 | 𪜶會親像蛇舐土粉，
親像啲趖的動物 愕愕惙對匿的孔出來。 𪜶會驚驚惶惶歸向上主 — 咱的上帝。 |
| 7:18 | 上帝啊，豈有別個神明會當及你比？
你赦免罪過， 寬赦所賰的子民犯的過失。 你無永遠囥受氣， 反轉意愛憐憫。 |
| 7:19 | 你會閣一遍憐憫阮，
將阮的罪踏佇腳底， 將一切的罪過㧒落深海。 |
| 7:20 | 你一定照你古早對阮列祖立誓的應允，
用信實對待雅各， 施落慈愛互亞伯拉罕。 |