| 章節 | 現代台語漢字2021版經文 |
| 4:1 | 永遠的和平 ( 賽 2:2-4 ) 佇將來的日子， 上主聖殿的山會堅立佇眾山的頂面， 比攏總的山嶺較高； 萬民攏會溢倚來歸伊。 |
| 4:2 | 萬國會來，講：
「咱來上上主的山， 來去雅各的上帝的殿。 伊會用伊的道路教示咱， 互咱通行伊的路。」 律法會對錫安發出； 上主的話會對耶路撒冷傳開。 |
| 4:3 | 伊會佇萬民中施行審判，
為遠遠的強國排解紛爭； 𪜶會將刀拍做犁頭， 將槍拍做鐮刀； 此國𣍐閣攑刀攻擊彼國， 嘛免閣學戰爭。 |
| 4:4 | 逐個人攏坐佇家己的葡萄樹腳及無花果樹腳，
無人會給𪜶拍青驚； 這是上主 — 萬軍的統帥親嘴講的。 |
| 4:5 | 雖然萬民攏靠家己神明的名生活，
毋拘阮欲奉上主 — 阮的上帝的名行踏，直到永永遠遠。 |
| 4:6 | 以色列人歸回本國 上主講： 「佇彼日，我欲聚集腳跛的， 招集受放逐的， 及我曾互𪜶受苦的。 |
| 4:7 | 我欲互腳跛的成做所賰的子民，
互受放逐的成做強國。 上主欲佇錫安山作王治理𪜶， 對此時到永遠。」 |
| 4:8 | 耶路撒冷啊，錫安城的堡壘啊，
你做羊群的守望台， 早前的主權欲閣歸互你， 王權欲回復互你。 |
| 4:9 | 你是按怎啲大聲哀哭？
是因為你無王，大臣死了了， 你才親像產婦催陣痛苦是無？ |
| 4:10 | 錫安的子民啊，你會親像產婦催陣痛苦，
因為你會離開此個城去住佇野外，去到巴比倫， 毋拘你會佇遐得著解救。 上主欲對對敵的手中給你贖回。 |
| 4:11 | 現在真多國家已經聯合起來欲攻擊你。
𪜶講：著互錫安受凌辱， 咱通親目看著。 |
| 4:12 | 毋拘𪜶毋知上主的心意，
無明白伊的計劃； 伊已經給𪜶聚集起來， 親像收集麥捆佇五穀場。 |
| 4:13 | 上主講：錫安的子民啊，起來碖五穀。
我欲互你鐵的角，銅的腳蹄，通拍碎列國， 將𪜶所搶的物提來獻互我， 將𪜶的財物獻互普天下的主。 |