| 章節 | 現代台語漢字2021版經文 |
| 1:1 | 下面是上主對摩利設人彌迦啟示的話；這是猶大王約坦、亞哈斯、希西家續接執政的時，彌迦所看見有關撒馬利亞及耶路撒冷的異象。 |
| 1:2 | 先知唱哀歌 萬民啊，著聽！ 全地及所有𫢶佇彼內面的，攏著注意聽。 至高的上主欲對伊的聖殿指證恁的毋著。 |
| 1:3 | 看咧，上主欲對伊住的所在出來，
降臨，腳踏佇地高的所在。 |
| 1:4 | 眾山會佇伊的腳下熔去，
親像蠟抵著火； 山谷會裂開， 親像大水沖落山坪。 |
| 1:5 | 這攏是因為雅各的罪過，
因為以色列家的罪惡； 雅各的罪過是什麼？ 豈毋是撒馬利亞？ 猶大的罪惡是什麼？ 豈毋是耶路撒冷？ |
| 1:6 | 所以，我欲互撒馬利亞變做荒埔，成做土堆，
做種葡萄的所在； 我欲將伊的城牆捙落去山谷， 互伊露出地基。 |
| 1:7 | 撒馬利亞雕刻的偶像攏會受拍碎，
伊做娼妓得著的財物會互火燒去； 我欲互所有的偶像變做廢物。 撒馬利亞做娼妓賺的錢， 會閣互人提去開佇娼妓的身上。 |
| 1:8 | 彌迦講：因為按呢，我大聲哀哭，
赤身露體行來行去； 我欲喉叫親像豺狼， 哀哭親像鴕鳥。 |
| 1:9 | 因為撒馬利亞的傷𣍐醫得，
已經湠到猶大， 到我子民的城門口， 甚至湠到耶路撒冷。 |
| 1:10 | 對敵逼近耶路撒冷 毋通佇迦特宣傳此個代誌， 嘛毋通啼哭； 著佇伯‧亞弗拉的塵埃頂翱來翱去。 |
| 1:11 | 沙斐的住民啊，恁會赤身露體見笑，
撒南的住民走𣍐出來； 伯‧以薛人哀哭，因為𪜶失去𪜶所倚靠的。 |
| 1:12 | 瑪律的住民迫切期待解救，
因為災禍已經對上主遐來到耶路撒冷的城門口。 |
| 1:13 | 拉吉的住民啊，著將戰車套佇快馬準備逃難；
因為你學以色列背叛上帝， 導錫安的子民犯罪。 |
| 1:14 | 你著用禮物給摩利設‧迦特送別；
以色列的君王會互亞革悉家騙去。 |
| 1:15 | 瑪利沙的住民啊，我欲導征服者到你遐；
以色列的貴族會逃走去亞杜蘭。 |
| 1:16 | 猶大家啊，著為所疼的兒女剃家己的頭，
剃甲親像禿頭鷹光光光； 因為𪜶攏受放逐離開恁。 |