| 章節 | 現代台語漢字2021版經文 |
| 4:1 | 約拿的受氣及上主的憐憫 約拿對此個代誌真無歡喜，非常受氣， |
| 4:2 | 就對上主祈禱講：「上主啊，我猶未走離本國的時，豈毋是有按呢講？我趕緊欲走去他施，是因為我知你是有恩典的上帝，充滿憐憫，𣍐快受氣，有豐盛的慈愛，會改變心意無欲降災禍。 |
| 4:3 | 上主，歸氣互我死死咧，我死比活啲較好。」 |
| 4:4 | 上主應講：「你按呢受氣豈著？」 |
| 4:5 | 約拿就出去城外，到城的東旁，為家己搭一個寮仔，坐佇蔭影下，欲看彼個城到底會發生什麼代誌。 |
| 4:6 | 主上帝安排一欉蓖麻，互伊發甲比約拿較高，做蔭影遮伊的頭殼，互伊免艱苦；約拿因為此欉蓖麻非常歡喜。 |
| 4:7 | 隔日透早，上帝安排一尾蟲食此欉蓖麻，蓖麻煞死去。 |
| 4:8 | 日出的時，上帝安排炎熱的東風；日頭曝約拿的頭殼，互伊強欲暈去；伊就為家己求死，講：「我死比活啲較好。」 |
| 4:9 | 上帝對約拿講：「你為著此欉蓖麻受氣豈著？」 約拿應講：「當然！我氣甲欲死。」 |
| 4:10 | 上主講：「此欉蓖麻毋是你種的，毋是你互伊大欉的，一暝大欉，隔暝死去，你都會毋甘； |
| 4:11 | 尼尼微此個大城，內面有十二萬𣍐曉分別好歹的人，閣有真多牲生，我豈毋免給伊疼惜？」 |