| 章節 | 現代台語漢字2021版經文 |
| 1:1 | 下面是俄巴底亞得著的啟示，是至高的上主所講關係以東的信息。
上主欲處罰以東 上主差遣使者去列國，傳達上主的信息；伊講：起來，咱來去及以東交戰。 |
| 1:2 | 上主對以東講：
「我欲互你佇列國中變做弱小； 你會大大受藐視。 |
| 1:3 | 你心內的驕傲欺騙你；
你住佇石洞內， 徛起佇高山頂， 所以，心內想講： 『什麼人會當給我拖落地？』 |
| 1:4 | 雖然你親像鷹鳥飛甲赫呢高，
作巢佇眾星辰的中間， 我嘛欲對遐給你拖落來。」 上主按呢講。 |
| 1:5 | 暝時賊若來偷，強盜若來搶，
𪜶豈毋是提所愛的物若定？ 挽葡萄的人若去你遐，豈𣍐留淡薄？ 毋拘，你會徹底受消滅。 |
| 1:6 | 以掃的子孫啊，恁藏的財寶竟然受搶奪！
|
| 1:7 | 所有及你結盟的國家趕你出你家己的國境；
你的盟友用騙術征服你。 食你的飯的人設羅網陷害你， 按呢你猶無發覺？ |
| 1:8 | 上主講：佇彼日，我欲毀滅以東的巧人，
欲掃除𪜶許個有智慧的人； |
| 1:9 | 提幔的戰士會驚惶，
以東所有的人會受剿滅。 |
| 1:10 | 以東受處罰的理由 因為你殘害家己的兄弟雅各， 你會見笑甲欲死， 永遠受毀滅。 |
| 1:11 | 對敵攻破伊的城門的時，
你恬恬徛啲看； 外族搶奪財物， 抽籤分耶路撒冷彼日， 你竟然插一腳。 |
| 1:12 | 你的兄弟抵著災難彼日，
你毋應該徛啲看； 猶大人受毀滅彼日， 你毋應該歡喜； 𪜶抵著災難彼日， 你毋應該給𪜶恥笑。 |
| 1:13 | 我的子民抵著災禍彼日，
你毋應該入去𪜶的城內； 𪜶抵著災難彼日， 你毋應該徛啲看𪜶受苦； 𪜶抵著災禍彼日， 你毋應該搶奪𪜶的財物。 |
| 1:14 | 你毋應該徛佇十字路頭截逃難的人，
嘛無應該佇災難的日將難民交互對敵。 |
| 1:15 | 上帝欲審判萬國 上主審判萬國的日到啦！ 以東啊，你按怎對待人，人嘛欲按呢對待你； 你按怎做，嘛欲按呢受報應。 |
| 1:16 | 恁佇聖山所飲刑罰的杯，
周圍列國嘛會續落去飲； 𪜶會繼續飲，灌甲醉， 到對地面消滅。 |
| 1:17 | 以色列得勝 錫安山啲欲有賰落來得救的人； 此個山欲成做聖山。 雅各的後代會收回𪜶的產業。 |
| 1:18 | 雅各的後代親像熱火，
約瑟的後代親像火焰， 𪜶欲燒以掃的後代親像燒麥稿。 以掃的後代攏賰無半個！ 上主按呢宣布。 |
| 1:19 | 猶大南旁的尼革夫住民會佔領以東山；住佇西旁山埔的人欲佔領非利士平原，閣收回以法蓮及撒馬利亞的土地。便雅憫人會佔領基列。 |
| 1:20 | 以色列流亡的大軍會轉來征服腓尼基，直到撒勒法；對耶路撒冷流亡去撒狄的人會佔領尼革夫的城鎮。 |
| 1:21 | 許個得勝者欲上錫安山，對遐統治以東；國權就歸佇上主。 |