| 章節 | 現代台語漢字2021版經文 |
| 1:1 | 下面是提哥亞一個顧羊人阿摩司的話。烏西亞做猶大王，約華施的子耶羅波安二世做以色列王的年間，就是大地動前兩年，上帝給阿摩司啟示有關以色列的事。 |
| 1:2 | 阿摩司講：
「上主對錫安親像獅啲哮， 對耶路撒冷親像雷啲彈； 顧羊人的草埔焦去， 迦密的山頂攏枯焦。」 |
| 1:3 | 對敘利亞 上主按呢講： 「大馬士革人一遍閣一遍犯罪， 我一定欲刑罰𪜶； 因為𪜶虐待基列人， 親像用鐵齒枋研五穀。 |
| 1:4 | 所以，我欲放火燒哈薛的王宮，
燒毀便‧哈達的宮殿。 |
| 1:5 | 我欲挵斷大馬士革城的門閂，
欲消滅亞文平原的住民， 以及伯‧伊甸的統治者， 將敘利亞人掠去吉珥。」 上主按呢宣告。 |
| 1:6 | 對非利士 上主按呢講： 「迦薩人一遍閣一遍犯罪， 我一定欲刑罰𪜶； 因為𪜶掠所有的住民， 賣互以東人做奴才。 |
| 1:7 | 所以，我欲放火燒迦薩的城牆，
燒毀伊的宮殿。 |
| 1:8 | 我欲消滅亞實突的住民，
以及亞實基倫的統治者； 我欲伸手攻擊以革倫， 直到所賰的非利士人攏滅亡。」 至高的上主按呢宣告。 |
| 1:9 | 對泰爾 上主按呢講： 「泰爾人一遍閣一遍犯罪， 我一定欲刑罰𪜶； 因為𪜶掠歸族的住民， 賣互以東人做奴才， 無遵守及友邦所定的盟約。 |
| 1:10 | 所以，我欲放火燒泰爾的城牆，
燒毀伊的宮殿。」 |
| 1:11 | 對以東 上主按呢講： 「以東人一遍閣一遍犯罪， 我一定欲刑罰𪜶； 因為𪜶用刀劍追殺家己的兄弟， 一點仔都無憐憫的心， 𪜶發性地無停， 起受氣無煞。 |
| 1:12 | 所以，我欲放火燒提幔，
燒毀波斯拉的宮殿。」 |
| 1:13 | 對亞捫 上主按呢講： 「亞捫人一遍閣一遍犯罪， 我一定欲刑罰𪜶； 為著欲擴展𪜶的領土， 𪜶破開基列有身的婦仁人。 |
| 1:14 | 所以，佇戰爭哄喝的日，
佇狂風大作的時， 我欲放火燒拉巴的城牆， 燒毀伊的宮殿； |
| 1:15 | 𪜶的王會受放逐，
王及伊的官員做夥受掠。」 上主按呢宣告。 |