| 章節 | 現代台語漢字2021版經文 |
| 1:1 | 下面是烏西亞、約坦、亞哈斯、希西家續接做猶大王，約華施的子耶羅波安二世做以色列王的時，上主對備利的子何西阿講的話。 |
| 1:2 | 何西阿的某及子兒 上主頭一遍對何西阿講話，講：「你去娶一個淫婦做某，收伊對淫亂生的囝仔；因為此個地方充滿淫亂，離開上主。」 |
| 1:3 | 何西阿就去娶滴拉音的查某子歌蜜，伊懷孕，生一個子。 |
| 1:4 | 上主對何西阿講：「給伊號名叫做耶斯列，因為閣無偌久，我欲因為耶戶家佇耶斯列刣人流血的罪給𪜶刑罰，欲斷絕以色列的王朝。 |
| 1:5 | 到彼日，我欲佇耶斯列山谷遏折以色列的弓。」 |
| 1:6 | 歌蜜閣懷孕生一個查某子；上主對何西阿講：「給伊號名叫做羅‧露哈瑪，因為我無欲疼惜以色列家，一定毋給𪜶赦免。 |
| 1:7 | 總是我欲疼惜猶大家，我上主 — 𪜶的上帝會救𪜶，毋是用弓，用刀，用交戰，用戰馬，抑是用馬兵救𪜶。」 |
| 1:8 | 羅‧露哈瑪斷奶了後，婦仁人閣懷孕生一個子。 |
| 1:9 | 上主講：「著給伊號名叫做羅‧阿米；因為恁毋是我的子民，我嘛毋是恁的上帝。」 |
| 1:10 | 以色列的復興 總是以色列的人額會親像海沙𣍐量得，𣍐算得。以前上帝佇什麼所在有對𪜶講「恁毋是我的子民」，將來佇遐欲對𪜶講「恁是永活上帝的子」。 |
| 1:11 | 猶大人及以色列人會聯合，選一個領袖，對此個地興起；因為耶斯列的日會成做榮光的日。 |