| 章節 | 現代台語漢字2021版經文 |
| 10:1 | 底格里斯河邊的異象 塞魯士做波斯皇帝第三年，互人叫做伯提沙撒的但以理得著啟示；彼個啟示是真實的，是有關一個大戰爭。但以理知影此個啟示的意思，嘛了解此個異象。 |
| 10:2 | 彼時我但以理憂傷三禮拜。 |
| 10:3 | 佇此中間，我無食好食的物件，無食肉，無飲酒，嘛無用油抹身軀。 |
| 10:4 | 正月二四，我佇底格里斯大河河邊， |
| 10:5 | 攑頭一下看，看著一個人穿幼麻布織的衫，縖烏法純金做的腰帶； |
| 10:6 | 伊的身軀親像青玉，面貌親像熠爁，目睭親像火焰，手及腳光甲親像磨光的銅，講話的聲親像歸群人啲喝的聲。 |
| 10:7 | 此個異象只有我但以理看見，及我做夥的人無一個有看見，毋拘𪜶攏非常驚惶，走去匿， |
| 10:8 | 賰我一個佇遐。我看見此個大的異象，就歸身軀無力，面失色，連一屑仔氣力都無。 |
| 10:9 | 我聽見伊講話的聲；我一下聽見，就仆落去，面向土腳，失去意識。 |
| 10:10 | 忽然有一支手給我摸，互我用腳頭窩及手蹄仔托佇土腳，身軀猶啲惙。 |
| 10:11 | 伊對我講：「得著上帝疼痛的但以理，你著明白我對你講的話。你徛起來。我現在互上帝差遣來你遮。」伊啲講的時，我徛起來，身軀皮皮惙。 |
| 10:12 | 伊閣給我講：「但以理，毋免驚！你對頭一日起就決心欲了解此個異象，佇你的上帝面前謙卑。伊有聽你的祈禱；我就是為著你的祈禱來的。 |
| 10:13 | 毋拘波斯國的守護天使給我擋佇波斯的領袖遐二十一日。後來，天使長中間的一位米迦勒來幫贊我。 |
| 10:14 | 現在我來是欲互你明白你的同胞以後會抵著的事；這是關係欲來的時期的異象。」 |
| 10:15 | 伊對我講諸個話的時，我面向土腳，無法度講話。 |
| 10:16 | 忽然有一個看起來親像人的來摸我的嘴唇；我就開嘴對彼個徛佇我面前的講：「我的主啊，我因為此個異象心內憂傷痛苦，歸身軀無力。 |
| 10:17 | 我是主的僕人，我那會堪得及我的主講話？現在我歸身軀無力，徛𣍐牢，強欲𣍐喘氣。」 |
| 10:18 | 彼個看起來親像人的閣給我摸，互我有氣力。 |
| 10:19 | 伊講：「毋免驚！你是上帝所疼的，願你平安！你著堅強，閣再堅強！」伊一下對我講話，我就回復氣力。我講：「我的主，請你繼續對我講話，你已經互我堅強起來啦。」 |
| 10:20 | 伊就講：「你已經知我是按怎來你遮。現在我欲倒去及波斯的守護天使交戰。你著知，我去了後，希臘的守護天使就會來。 |
| 10:21 | 毋拘我欲將真理的冊記錄的事給你講。以色列的守護天使米迦勒以外，無一個會當幫贊我抵抗𪜶。」 |