| 章節 | 現代台語漢字2021版經文 |
| 8:1 | 綿羊及山羊的異象 伯沙撒作王第三年，我但以理看見第一個異象了後，閣有一個異象對我出現。 |
| 8:2 | 我看見家己佇以攔省的書珊城堡，徛佇烏萊河邊。 |
| 8:3 | 我攑頭一下看，看著一隻綿羊徛佇河邊。伊有兩支長的角，其中一支比另外一支較長；較長彼支路尾才發出來。 |
| 8:4 | 我看見彼隻綿羊向西、向北、向南啲觸；無一隻動物擋伊會牢，無一隻會當走閃伊的威力。伊照家己的意思行來行去，耀武揚威。 |
| 8:5 | 我猶啲想的時，閣看見一隻山羊對西旁來，行透全地，腳無踏著土。此隻山羊佇伊兩蕊目睭的中間有一支真顯目的角。 |
| 8:6 | 伊去我抵即看著，徛佇河邊，有兩支角的綿羊遐，對伊發受氣，大力闖去。 |
| 8:7 | 我看見伊倚近彼隻綿羊，氣沸沸給觸，觸甲綿羊兩支角攏斷去，無力通反抗。山羊給綿羊挵倒佇土腳，閣直直給伊踐踏，無人會當給伊解救。 |
| 8:8 | 此隻山羊愈來愈聳鬚。到伊上勇壯的時，伊彼支大支角斷去。對彼支角原來的所在，向天下四的方向發四支真顯目的角。 |
| 8:9 | 對彼中間的一支角閣生一支細支角，向南、向東、向肥閣媠的地愈發愈大支， |
| 8:10 | 大甲抵著天頂萬象，會當將天頂萬象及星辰摔落地面，給𪜶踐踏。 |
| 8:11 | 伊自高自大，想講家己會當及天象的元帥比並。伊禁止人逐日獻祭互天象的元帥，閣毀壞元帥的聖所。 |
| 8:12 | 伊強迫聖的子民佇逐日獻祭的事犯罪；伊閣將真理㧒佇土腳。諸個事，伊攏做了真順利。 |
| 8:13 | 後來，我聽見一個聖者啲講話，閣有另外一個聖者對頭一個聖者講：「逐日著獻的祭受禁止，互地荒廢的罪，聖所及子民受踐踏，諸個異象底時會實現？」 |
| 8:14 | 伊給我講：「閣兩千三百暝日，聖所就一定會得著潔淨。」 |
| 8:15 | 天使加百列解說異象 我但以理看見此個異象，抵想欲知彼個意思的時，忽然有一位親像人的款式的徛佇我的面前。 |
| 8:16 | 我閣聽見烏萊河遐有人的聲喝講：「加百列，著互此個人明白此個異象。」 |
| 8:17 | 伊就來我徛的所在。伊一下到，我真恐惶，面仆佇土腳。 伊給我講：「人啊，你著了解，此個異象有關係歷史的終局。」 |
| 8:18 | 伊對我講話的時，我暈倒，面向土腳。伊給我摸，給我扶起來。 |
| 8:19 | 伊講：「我給你指示上帝停止發大受氣的時會發生的代誌；這及上帝所指定歷史的終局的時間有關。 |
| 8:20 | 「你看著彼隻有兩支角的綿羊是指米底亞王及波斯皇帝。 |
| 8:21 | 彼隻山羊就是希臘王；兩蕊目睭中間的大支角就是希臘第一個王。 |
| 8:22 | 關係大支角斷去，閣對角的下面發四支角出來，就是有四個國欲對彼個國生出來，毋拘勢力攏不比彼個國。 |
| 8:23 | 「此四個國到末期罪惡貫滿的時，一定會有一個王興起；伊面貌兇惡，詭計多端。 |
| 8:24 | 伊的權柄非常大，毋拘毋是因為伊家己的才調。伊會造成非常大的毀滅，會當照家己的意思順利進行；閣會毀滅有權力的人及聖的子民。 |
| 8:25 | 伊真奸詐，𠢕用詭計互伊欲做的事順利進行。伊自高自大，會趁人無防備的時害死真多人，閣欲起來敵對萬王的王，毋拘伊會互超過人能力的氣力給伊消滅。 |
| 8:26 | 以上所講兩千三百暝日的異象攏會發生，毋拘你著保守此個祕密，因為這關係將來真久的事。」 |
| 8:27 | 因為按呢我但以理非常厭倦，破病幾若日，後來才起來辦理王交代的政事。我因為此個異象驚惶困擾，因為𣍐了解異象的意思。 |