| 章節 | 現代台語漢字2021版經文 |
| 2:1 | 尼布甲尼撒的夢 尼布甲尼撒坐位第二年，伊夢著一個夢。此個夢互伊心真煩，睏𣍐去。 |
| 2:2 | 王就下令召集術士、行法術的、行邪術的，及星象家來，愛𪜶將王的夢給伊講。𪜶攏來徛佇王的面前。 |
| 2:3 | 王給𪜶講：「我夢著一個夢，心真煩，愛欲知此個夢是什麼意思。」 |
| 2:4 | 許個星象家用亞蘭語對王講：「皇上萬歲！請將彼個夢給你諸個僕人講，互阮通解說彼個夢的意思。」 |
| 2:5 | 王給𪜶講：「我已經決定，愛恁將我的夢給我講。恁若無將我的夢給我講，閣解說互我聽，我就欲斬斷恁的腳手，恁的厝嘛會變做糞埽堆。 |
| 2:6 | 毋拘恁若給我講彼個夢及夢的意思，恁就有賞，會得著禮物，閣得著極大的榮譽。現在，著將彼個夢給我講，閣給我解說。」 |
| 2:7 | 𪜶閣一遍給王講：「請皇上將你的夢給你的僕人講，阮就會給王解說。」 |
| 2:8 | 王就講：「我早就知，恁啲拖時間，因為恁知，我講會到做會到。 |
| 2:9 | 恁若無欲給我講此個夢，我會給恁判刑，因為恁共謀欲騙我，聽候時勢改變。今恁著將此個夢給我講，我就知恁真正會曉解說此個夢。」 |
| 2:10 | 許個星象家閣對王講：「世間無人會當將王愛知的事講出來。猶毋曾有君王、大臣、統治者要求術士、行法術的、星象家做此款代誌。 |
| 2:11 | 皇上問的問題實在真困難；除了神明以外，無人會當回答皇上的問題。」 |
| 2:12 | 因為按呢，王非常受氣，下令欲刣死巴比倫所有有智慧的人。 |
| 2:13 | 此個命令一下發出，人就去尋但以理及伊的同伴，嘛欲給𪜶刣死。 |
| 2:14 | 上帝將夢的意思指示但以理 王的侍衛長亞略出去欲刣巴比倫有智慧的人的時，但以理用婉轉、智慧的話 |
| 2:15 | 對王的侍衛長亞略講：「王是按怎發出赫呢緊急的命令？」亞略就將代誌的經過給但以理講。 |
| 2:16 | 但以理就入去見王，請求王延長期限，通互伊給王解說夢的意思。 |
| 2:17 | 但以理倒去伊的厝，將此個代誌給伊的同伴哈拿尼雅、米沙利，及亞撒利雅講， |
| 2:18 | 愛𪜶祈禱，求天頂的上帝憐憫，將此個夢的奧祕指明，互𪜶毋免及巴比倫有智慧的人做夥受刣。 |
| 2:19 | 彼暗，上帝就佇異象中將彼個夢的意思給但以理啟示。但以理就頌讚天頂的上帝， |
| 2:20 | 講：
願上帝的名得著稱讚， 世世代代無窮盡！ 伊全智、全能。 |
| 2:21 | 伊改變時間，變換季節；
伊廢除王，選立王； 伊互智慧的人有智慧， 互聰明的人有智識。 |
| 2:22 | 伊啟示奧祕隱密的事，
伊知暗中的一切； 光及伊同在。 |
| 2:23 | 我的列祖的上帝啊，
我感謝你，稱讚你！ 因為你賜我智慧及才能， 阮求問你的，你已經啟示我， 將王愛欲知的指示阮。 |
| 2:24 | 但以理為王解夢 但以理就去見王派去欲刣全國有智慧的人的亞略，對伊講：「求你毋通刣死全國所有有智慧的人！請你給我引進去見王，我會當給伊解夢。」 |
| 2:25 | 亞略隨時導但以理去見王。亞略對王講：「我佇受掠的猶太人中間尋著一個人；伊會當給王解夢。」 |
| 2:26 | 王對叫做伯提沙撒的但以理講：「你真正會當將我的夢給我講，閣解說互我知噢？」 |
| 2:27 | 但以理應王講：「王所愛知彼個奧祕的事，有智慧的、行法術的、術士、占卜的無一個會當給王解說， |
| 2:28 | 只有天頂彼位上帝才會當將彼個祕密啟示出來。伊已經將未來啲欲發生的事給皇上指示啦。你夢著的及啲思考的異象是按呢： |
| 2:29 | 「皇上，你佇眠床啲想有關將來的事，彼位啟示奧祕的主已經將未來欲發生的事通過此個夢給你指示啦。 |
| 2:30 | 不過，我會當明白此個奧祕的啟示，毋是因為我比所有的人較有智慧，是上帝欲互王知影此個夢的意思，互你知你心內啲想什麼。 |
| 2:31 | 「皇上，你佇夢中有看著一座非常大身的像。此座像真高，閣非常燦爛顯目；徛佇你的面前，形狀非常可怕。 |
| 2:32 | 伊的頭殼是純金的，胸坎及手是銀的，腹肚及腰是銅的， |
| 2:33 | 大腿是鐵的，下面的腳是鐵及土濫的。 |
| 2:34 | 你啲看的時，忽然有一塊毋是人的手拍的石頭，拍著彼座大像鐵及土濫啲造的腳，給腳拍碎。 |
| 2:35 | 此個大像，鐵及土、銅、銀、金逐部份煞攏做一下碎糊糊，碎甲親像熱天的五穀場的粗糠互風吹散，連一屑仔都尋無。彼塊拍著大像的石頭變做一座山，大甲給全地蓋起來。 |
| 2:36 | 「以上是王做的夢。今，我欲將此個夢的意思給王說明。 |
| 2:37 | 皇上，你是列王中上偉大的王，天頂的上帝已經將國家、權柄、威力、尊榮攏賜互你， |
| 2:38 | 嘛將住佇逐所在的人、野地的走獸、空中的飛鳥攏交互你管理。你就是彼個金的頭殼。 |
| 2:39 | 你以後，會有一個比你較弱的國家興起，然後有第三個親像銅的國家，欲掌管天下。 |
| 2:40 | 後來會有第四個國家，伊會親像鐵赫呢碇、赫呢強。鐵會將逐項物件拍碎；彼個國嘛會親像按呢給所有的國家拍倒。 |
| 2:41 | 抵抵照你看著的，用鐵及燒瓷師傅的土濫做夥造的腳及腳指頭仔，是指一個會分裂的國家，毋拘伊猶是有親像鐵的氣力。 |
| 2:42 | 許個用鐵及土濫做夥造的腳指頭仔，表示此個國家一部份強一部份弱。 |
| 2:43 | 抵抵照你看著的，伊是鐵及土濫做夥的，是指此個國家的人會及別個種族通婚生子，毋拘𪜶𣍐團結，親像鐵及土𣍐當結合做一個。 |
| 2:44 | 許個王在位的時，天頂的上帝會建立一個永遠𣍐滅亡的國。此個國的主權𣍐互列國搶去，顛倒會拍倒毀滅所有的國家；伊欲永遠徛在。 |
| 2:45 | 照你看著的，彼粒對山頂翱落來，毋是人的手拍的石頭，將鐵、銅、土、銀、金攏拍碎。至大的上帝互皇上做此個夢，就是欲互你知將來欲發生的代誌。你的夢是真的，夢的解說是確實的。」 |
| 2:46 | 王賞但以理 尼布甲尼撒王就仆佇土腳拜但以理，閣命令人送禮物及芳料互伊。 |
| 2:47 | 王對但以理講：「恁的上帝真正是萬神的神、萬主的主，是奧祕的啟示者！伊互你會曉將此個奧祕解說互我知。」 |
| 2:48 | 王就高升但以理，賜伊真多上等的禮物，派伊管理巴比倫全省，閣設立伊管理全國有智慧的人。 |
| 2:49 | 王閣接受但以理的請求，派沙得拉、米沙、亞伯尼歌管理巴比倫省的事務；毋拘但以理留佇王宮侍奉王。 |