| 章節 | 現代台語漢字2021版經文 |
| 45:1 | 歸互上主的土地 「恁抽籤分土地互逐支族做產業的時，著留一份獻互上主。此塊土地著長十二公里半，闊十公里；此個地區攏是聖的。 |
| 45:2 | 著對彼中間畫一塊地，長、闊攏是兩百五十公尺，做聖所的用地；四周圍著閣畫闊二十五公尺的空地。 |
| 45:3 | 量此塊地的一半，長十二公里半，闊五公里，著畫伊做聖所的用地，是至聖的。 |
| 45:4 | 這是全國中間聖的所在，欲歸互管理聖殿，親近閣侍奉上主的祭司；𪜶的厝及聖殿攏佇此個聖的地區內面。 |
| 45:5 | 另外一半長十二公里半，闊五公里的土地，欲歸互佇聖殿侍奉的利未人，做𪜶住的所在。 |
| 45:6 | 「閣著佇聖的土地邊仔畫一塊地，長十二公里半，闊兩公里半，做以色列人徛起的城鎮。」 |
| 45:7 | 君王的土地 「欲畫互君王的土地是佇聖的土地及以色列人城鎮的用地的雙旁，一旁佇聖的土地隔壁，一旁佇城鎮用地的隔壁。西旁的地迵到地中海，東旁的地迵到東旁的邊界；土地的長度及以色列逐支族分著的土地仝款。 |
| 45:8 | 此塊地是君王佇以色列中間分著的產業。按呢，王𣍐閣欺壓我的子民；伊欲照逐支族應該得著的土地分互以色列人民。」 |
| 45:9 | 君王應該遵守的規例 至高的上主按呢講：「以色列的君王啊，我無欲閣忍受恁啦！著停止強暴及欺壓的事；著秉公行義。恁毋通閣搶奪我子民的土地。我 — 至高的上主按呢宣布。 |
| 45:10 | 恁著用公道的天秤、伊法、罷特。 |
| 45:11 | 量固體的伊法及量液體的罷特份量著仝款，用『賀梅珥』做單位，一『賀梅珥』就是十伊法，嘛是十罷特。 |
| 45:12 | 「計算重量的單位是『舍客勒』；一『舍客勒』就是二十『季拉』；一『彌那』就是六十『舍客勒』。 |
| 45:13 | 「恁著照按呢奉獻恁的祭物：
小麥：著奉獻收成的六十分之一 大麥：著奉獻收成的六十分之一 |
| 45:14 | 橄欖油：著奉獻收成的百分一
|
| 45:15 | 羊：著對以色列水源充足的草場取羊，每兩百隻奉獻一隻 「諸個通做素祭、燒化祭、平安祭的祭物，為人民贖罪。我 — 至高的上主按呢宣布。 |
| 45:16 | 「全國的人民攏著帶此個祭物去到以色列的君王遐。 |
| 45:17 | 佇初一、安歇日，及其他以色列人的節日，王著負責提供燒化祭、素祭、奠酒祭的祭物。伊著準備贖罪祭、素祭、燒化祭，及平安祭的祭物，互祭司為以色列人民贖罪。」 |
| 45:18 | 節期 ( 出 12:1-20 利 23:33-43 ) 至高的上主按呢講：「正月初一，你著獻一隻無瑕疵的細隻牛做祭物，潔淨聖殿。 |
| 45:19 | 祭司著提贖罪祭牲生的血抹佇聖殿的門徛、祭壇的四支角，以及內埕大門的門框。 |
| 45:20 | 正月初七，你嘛著為許個無意中，抑是因為無知犯罪的人獻祭；按呢，聖殿就得著潔淨。 |
| 45:21 | 「對正月十四開始，恁著守𨃟過節。佇此七日的節期中，恁攏著食無酵餅。 |
| 45:22 | 節期的第一日，王著為家己及全國人民準備一隻牛做贖罪祭。 |
| 45:23 | 佇此七日的節期中，伊著逐日備辦七隻無瑕疵的牛及七隻綿羊做燒化祭，獻互上主。伊嘛著逐日準備一隻山羊做贖罪祭。 |
| 45:24 | 伊閣著備辦素祭；每一隻牛抑是綿羊配十七公升半的幼麵粉，閣合三公升的油。 |
| 45:25 | 七月十五守搭寮節的時，王著照𨃟過節的條例，佇七日的節期中，逐日準備贖罪祭、燒化祭、素祭，及油諸個祭物。」 |