| 章節 | 現代台語漢字2021版經文 |
| 43:1 | 上主的榮光充滿聖殿 了後，彼個人導我去向東的門。 |
| 43:2 | 看咧！以色列上帝的榮光對東旁來。伊的聲親像大水夯湧嘩嘩哮；地因為伊的榮光發出光彩。 |
| 43:3 | 此個異象及以前我所看見上帝毀滅耶路撒冷的異象，以及我佇迦巴魯河邊看見的異象像款，我就仆落土腳。 |
| 43:4 | 上主的榮光對東門進入聖殿。 |
| 43:5 | 上帝的神給我夯起來，帶我入去內埕。佇遐，我看見上主的榮光充滿聖殿。 |
| 43:6 | 彼個人徛佇我身邊；我聽見有一個聲對聖殿給我講： |
| 43:7 | 「人子啊，遮是我的寶座，是我的腳砧；我欲永遠住佇以色列人的中間。以色列人及𪜶的君王𣍐用得閣因為拜偶像行淫亂，抑是因為君王的屍體褻瀆我的聖名。 |
| 43:8 | 𪜶將王宮的戶橂起倚我聖殿的戶橂，閣將王宮的門柱起倚我聖殿的門柱；𪜶及我的中間干焦隔一堵牆。𪜶用諸個通厭惡的事褻瀆我的聖名，所以我發大受氣給𪜶消滅。 |
| 43:9 | 今，𪜶𣍐用得閣拜偶像，閣著將君王的屍體徙離開我聖的所在，我就欲永遠住佇𪜶中間。 |
| 43:10 | 「人子啊，你著將此個聖殿的設計指示以色列人，互𪜶量聖殿的大細，對按呢會曉為著家己的罪惡感覺見笑。 |
| 43:11 | 𪜶若為著家己的行為感覺見笑，你著將此個聖殿的設計、款式、出入口、所有的設計及規例、所有的款式及條例攏給𪜶講。你著佇𪜶的面前將諸個寫清楚，互𪜶通照此個聖殿的設計及規例去做。 |
| 43:12 | 聖殿的條例是按呢：聖殿著起佇山頂，聖殿的四周圍是至聖。著會記得，這就是聖殿的條例。」 |
| 43:13 | 祭壇 祭壇的寸尺是：祭壇的基座高五十公分，闊五十公分；四周圍有唇，闊二十五公分。 |
| 43:14 | 第二層基座高一公尺，闊五十公分。第三層基座高兩公尺，闊五十公分。 |
| 43:15 | 爐台，就是上頂面層，高兩公尺，頂面有翹起來的四支角，高五十公分。 |
| 43:16 | 爐台長及闊攏是六公尺，是四方的。 |
| 43:17 | 基座的長及闊攏是七公尺，是四方的。四周圍有唇，闊二十五公分。基座四周圍闊五十公分。上祭壇的崎仔向東旁。 |
| 43:18 | 奉獻祭壇 至高的上主對我講：「人子啊，下面是有關祭壇的條例：祭壇造好以後，著佇祭壇頂面獻燒化祭，灑獻祭的血。 |
| 43:19 | 你著牽一隻牛仔，交互侍奉我的祭司，就是利未支族，撒督的後代，獻做贖罪祭。我 — 至高的上主按呢宣布。 |
| 43:20 | 你著提牛的血抹祭壇翹起來的四支角，及爐台的四角頭，以及四周圍捅出來的唇。你著按呢做來潔淨祭壇互伊清氣。 |
| 43:21 | 你著將贖罪祭的牛仔帶去聖殿外面，佇指定的所在燒掉。 |
| 43:22 | 第二日，你著獻一隻無瑕疵的山羊做贖罪祭潔淨祭壇，親像用牛仔潔淨祭壇仝款。 |
| 43:23 | 祭壇潔淨了後，你著牽一隻無瑕疵的牛仔及一隻無瑕疵的綿羊， |
| 43:24 | 來到上主面前。祭司著撒鹽佇𪜶的身軀頂，將𪜶做燒化祭獻互上主。 |
| 43:25 | 連續七日，你著逐日獻一隻牛仔、山羊，及綿羊做贖罪祭。諸個牲生攏著無瑕疵的。 |
| 43:26 | 此七日內，祭司著逐日為祭壇行潔淨禮，互伊清氣；給伊分別作聖。 |
| 43:27 | 第八日，祭司著佇祭壇頂為人民獻燒化祭及平安祭。按呢，我就欲接納恁。」至高的上主按呢宣布。 |