| 章節 | 現代台語漢字2021版經文 |
| 39:1 | 歌革受拍敗 至高的上主講：「人子啊，你著對米設及土巴此兩個國家的統治者歌革傳達我的信息，講：『至高的上主按呢講：我欲及你作對。 |
| 39:2 | 我欲給你調翻頭，互你離開極北旁的所在，導你去攻打以色列的山。 |
| 39:3 | 然後，我欲給你倒手的弓及正手的箭拍落去。 |
| 39:4 | 你及你的軍隊，以及隨你來的外族人，攏欲死佇以色列的山。我欲互你做鷹鳥及野獸的食物。 |
| 39:5 | 我曾講，你欲死佇野地。我 — 至高的上主按呢宣告。 |
| 39:6 | 我欲放火燒瑪各及平安徛起佇沿海一帶的人民。按呢，𪜶就知我是上主。 |
| 39:7 | 我欲佇我的子民以色列中間顯示我的聖名，絕對無容允我的聖名閣受褻瀆。按呢，列國就知我是上主 — 以色列神聖的上帝。 |
| 39:8 | 「『恁著知！日期到啦，我講的彼日來啦！至高的上主按呢宣布。 |
| 39:9 | 以色列逐城鎮的住民欲出去拾人㧒确的軍器做燃火的柴，就是盾牌、弓、箭、槍、棍仔；諸個有夠互𪜶燃七年久。 |
| 39:10 | 𪜶毋免閣去野外拾柴，毋免閣去樹林剉柴，因為人㧒确的軍器會當互𪜶燃火。𪜶欲搶許個曾搶𪜶的人，欲劫許個曾劫𪜶的人。至高的上主按呢宣布。』」 |
| 39:11 | 歌革的埋葬 上主講：「佇彼日，我欲佇死海的東旁以色列地的『出外人山谷』，尋一塊地互歌革做墓地。此塊墓地會擋著欲對遐經過的人，因為歌革及跟隨伊的軍兵埋葬佇遐。此個山谷欲叫做『歌革軍兵谷』。 |
| 39:12 | 以色列人為著欲潔淨彼塊地，用七個月的時間給𪜶埋葬。 |
| 39:13 | 彼所在的人攏出來參與，對按呢，𪜶得著謳咾。這是我顯示榮光的日。我 — 至高的上主按呢宣布。 |
| 39:14 | 𪜶七個月久派專人去逐所在巡查，將許個來侵犯以色列的人的屍體埋葬好勢，互土地潔淨。 |
| 39:15 | 巡查的人行透逐所在，看著死人的骨頭，就佇邊仔做記號，聽候人將許個骨頭埋葬佇『歌革軍兵谷』。 |
| 39:16 | 佇遐嘛有一座城叫做哈摩那，意思是『軍兵的城』。按呢，土地就得著潔淨。」 |
| 39:17 | 至高的上主對我講：「人子啊，著對逐種的飛鳥及野獸講：『來，對逐所在聚集倚來，來食我佇以色列的山為恁準備的祭肉。恁通佇遐食肉飲血。 |
| 39:18 | 恁欲食戰士的肉，飲世間首領的血，親像啲食巴珊肥的綿羊、羊仔子、山羊、牛像款。 |
| 39:19 | 恁欲食我為著恁準備的祭肉；食肉食甲飽，飲血飲甲醉。 |
| 39:20 | 恁欲佇我的宴席食戰馬、馬兵、戰士，就是所有大軍的肉，食到飽飽飽。至高的上主按呢宣告。』」 |
| 39:21 | 以色列復興 上主講：「我欲對列國顯示我的榮光，萬民就欲看見我按怎下手佇𪜶身上，施行審判。 |
| 39:22 | 對彼日起，以色列人欲知我是上主 — 𪜶的上帝。 |
| 39:23 | 列國欲明白，以色列人受放逐是因為𪜶的罪過。𪜶背叛我，我就面越走無看顧𪜶，閣將𪜶交互𪜶的對敵，互對敵給𪜶刣死。 |
| 39:24 | 我照𪜶的污穢及罪過對待𪜶。我面越走無欲看顧𪜶。」 |
| 39:25 | 至高的上主閣講：「今，我欲憐憫以色列所有的人民，互受放逐的雅各後代轉來，閣欲盡力維護我的聖名。 |
| 39:26 | 𪜶佇家己的鄉土安居樂業，無受威脅的時，𪜶欲𣍐記得過去所受的見笑及背逆我的罪。 |
| 39:27 | 我給𪜶對對敵的地聚集起來，對列國導轉來的時，列國就知我是神聖。 |
| 39:28 | 我給𪜶放逐去外邦，後來閣給𪜶聚集轉來本地，無留一個佇外邦，𪜶就知我是上主 — 𪜶的上帝。 |
| 39:29 | 我欲將我的神摒落互以色列人，𣍐閣越轉身無看顧𪜶。」至高的上主按呢宣布。 |