| 章節 | 現代台語漢字2021版經文 |
| 37:1 | 枯焦的骨頭閣活 上主的氣力充滿我；伊的神導我去一個山谷；彼個山谷四界攏是骨頭。 |
| 37:2 | 伊導我行透歸個山谷。我看見骨頭遍滿山谷；許個骨頭攏焦硞硞。 |
| 37:3 | 伊對我講：「人子啊，諸個骨頭豈會閣活起來？」我應講：「至高的上主，這只有你知！」 |
| 37:4 | 伊閣對我講：「你著對諸個骨頭傳達我的信息，講：『枯焦的骨頭，著聽上主的話。 |
| 37:5 | 至高的上主對恁講：我欲歕氣入去恁內面，互恁活起來。 |
| 37:6 | 我欲互恁生筋生肉，閣用皮給恁包起來。我欲歕氣入恁內面，互恁活起來。按呢，恁就知我是上主。』」 |
| 37:7 | 我就遵照上主的命令傳達伊的信息。啲講的時，忽然我聽見敧敧硞硞的聲，骨頭及骨頭連接起來。 |
| 37:8 | 我注意看，骨頭開始生筋生肉，閣有皮給𪜶包起來，毋拘無活氣。 |
| 37:9 | 上主對我講：「人子啊，你著對風傳達我的信息，講：『至高的上主按呢講：風啊，著對四面吹來，吹入去諸個互人刣死的人內面，互𪜶活起來。』」 |
| 37:10 | 我就遵照上主的命令傳達伊的信息；氣就進入骨頭內面，𪜶就活起來，徛啲。𪜶的數目親像軍隊赫呢多。 |
| 37:11 | 上主對我講：「人子啊，諸個骨頭就是以色列人。𪜶講：『阮的骨頭焦硞硞，無向望無前途。』 |
| 37:12 | 所以，你著對我的子民以色列傳達我的信息，講：『至高的上主按呢講：我的子民啊，我欲拍開恁的墳墓，互恁對墓出來，導恁轉去以色列地。 |
| 37:13 | 我拍開恁的墳墓，導恁出來了後，恁就知我是上主。 |
| 37:14 | 我欲將我的氣歕入恁內面，互恁活起來。我欲給恁安置佇恁家己的土地。按呢，恁就知我是上主。我講出嘴，一定實行。』上主按呢宣布。」 |
| 37:15 | 猶大及以色列組成聯合王國 上主對我講： |
| 37:16 | 「人子啊，你去提一塊柴枋來，佇頂面寫『猶大王國及伊的人民』；閣去提另外一塊柴枋，佇頂面寫『以色列王國及伊的人民』。 |
| 37:17 | 然後，將此兩塊柴枋連做夥，互𪜶佇你的手中成做一塊。 |
| 37:18 | 你的同胞若問你：『你豈無欲給阮講這是什麼意思？』 |
| 37:19 | 你著給𪜶講：『至高的上主按呢講：我欲給代表以色列彼塊柴枋連佇代表猶大彼塊，互兩塊佇我的手中成做一塊。』 |
| 37:20 | 「你著將你有寫字彼兩塊柴枋提佇手裡互𪜶看。 |
| 37:21 | 然後，你著給𪜶講：『至高的上主按呢講：我欲將我的子民以色列對𪜶受放逐的列國中帶出來；我欲對世界逐角落給𪜶聚集起來，導𪜶倒來家己的土地。 |
| 37:22 | 我欲互𪜶佇以色列的眾山，此塊土地，成做一個國家，只有一個王統治；𪜶無閣是兩國，𣍐閣分裂做兩國。 |
| 37:23 | 𪜶𣍐閣因為拜偶像及通厭惡的物，以及其他的罪過拍垃墋家己。我欲救𪜶脫離背逆的生活，給𪜶洗清氣。按呢，𪜶欲做我的子民，我欲做𪜶的上帝。 |
| 37:24 | 「『我的僕人大闢欲作王統治𪜶；𪜶欲歸屬一個牧者。𪜶欲服從我的命令，遵守我的規例。 |
| 37:25 | 𪜶欲住佇我賜互我的僕人雅各彼塊土地，就是𪜶的祖先住過的彼塊地。𪜶及𪜶的子子孫孫欲永遠住佇遐。我的僕人大闢欲作王統治𪜶，直到永遠。 |
| 37:26 | 我欲及𪜶立平安的約；此個約欲成做永遠的約。我欲互𪜶安居樂業，人口加添，閣設立我的聖殿佇𪜶中間，直到永遠。 |
| 37:27 | 我欲徛起佇𪜶中間。我欲做𪜶的上帝，𪜶欲做我的子民。 |
| 37:28 | 我欲互我的聖殿永遠𫢶佇𪜶中間，列國就知，是我上主給以色列分別作聖。』」 |