| 章節 | 現代台語漢字2021版經文 |
| 35:1 | 上帝刑罰以東 上主對我講： |
| 35:2 | 「人子啊，你著對以東人傳達我的信息，指責𪜶。 |
| 35:3 | 著給𪜶講，我 — 至高的上主按呢講：
以東人，我欲及你作對！ 我欲伸手攻擊你，互你拋荒荒廢。 |
| 35:4 | 我欲互你的城鎮拋荒；
互你的土地變做荒埔；按呢，你就知我是上主。 |
| 35:5 | 「你對古早就怨恨以色列。以色列因為罪惡貫滿受刑罰的時，你給𪜶放互人屠殺。 |
| 35:6 | 所以，我 — 至高的上主指家己的活命立誓：我欲互你抵著流血的報應，血一定會追趇你；你既然無怨恨刣人流血，流人血的罪一定給你纏一世人。 |
| 35:7 | 我欲互西珥山拋荒荒廢，無欲互人閣對遐經過。 |
| 35:8 | 我欲互以東所有的山遍滿身屍；互刀刣死的人倒佇你的山崙仔、山谷，及溪溝。 |
| 35:9 | 我欲互你永遠荒廢，無閣有人住佇你的城鎮。按呢，恁就知我是上主。 |
| 35:10 | 「你曾講：『猶大及以色列此兩國及𪜶的土地攏是我的，欲做我的產業。』其實，上主猶佇遐。 |
| 35:11 | 所以，至高的上主指家己的活命立誓：你按怎受氣、怨妒我的子民，我嘛欲照按呢對待你。我審判你的時，欲互𪜶識我。 |
| 35:12 | 彼時你就知，我上主有聽見你侮辱以色列眾山的話，講：『諸個山已經荒廢，欲互阮吞滅。』 |
| 35:13 | 你自高誇口，無站節攻擊我的話，我攏有聽見。 |
| 35:14 | 「至高的上主按呢講：『我一定欲互你荒廢，彼時全地欲歡喜快樂。 |
| 35:15 | 你佇以色列人的地拋荒的時歡喜，我嘛欲照你的所做對待你。西珥山及以東全國攏欲拋荒荒廢，人就知我是上主。』」 |