| 章節 | 現代台語漢字2021版經文 |
| 33:1 | 上主指派以西結作守望者 ( 結 3:16-21 ) 上主對我講： |
| 33:2 | 「人子啊，著給你的同胞講，我互一個國家抵著戰亂，彼個國家的人民著對𪜶中間選一個人做守望者。 |
| 33:3 | 守望者看著對敵逼近，就歕哨角警告人民。 |
| 33:4 | 若有人聽著哨角的聲毋拘無警覺，煞互對敵刣死，伊著為家己的死負責任。 |
| 33:5 | 伊聽著哨角的聲毋拘無警覺，伊著為家己的死負責任。伊若接受警戒，就會當救家己的性命。 |
| 33:6 | 守望者看著對敵逼近，若無歕哨角，致到人民毋知通警戒，煞有人互對敵刣死，就是講彼個人有罪該死，我嘛愛守望者為著彼個人的死負責任。 |
| 33:7 | 「人子啊，今我指派你做以色列人民的守望者。你著將我給你講警告的話給𪜶講。 |
| 33:8 | 若是我宣布某一個邪惡的人一定著死，你卻無去給伊警告，勸伊改邪歸正，此個人雖然嘛會因為家己的罪來死，毋拘我欲對你追究伊死的責任。 |
| 33:9 | 你若有警告彼個人毋通繼續作歹，毋拘伊無欲改邪歸正，伊會因為家己的罪死；伊的死，你毋免負責任。」 |
| 33:10 | 個人的責任 上主對我講：「人子啊，以色列人曾講：阮的罪及過失親像重擔給阮硩咧，阮因為按呢失志衰荏，毋知欲按怎活落去。 |
| 33:11 | 你著給𪜶講，我 — 至高的上主指家己的活命立誓，我毋愛歹人死亡，愛𪜶離開歹路來得著活命。以色列人啊，恁著悔改，越倒轉，離開邪惡的行為！恁哪欲尋死咧？ |
| 33:12 | 「所以，人子啊，著給你的同胞講：『義人犯罪，伊早前做的好事𣍐救伊。歹人悔改，伊早前做的歹𣍐互伊滅亡；義人犯罪，伊早前的好行為𣍐互伊得著活命。』 |
| 33:13 | 我對義人講『你一定會活』，毋拘伊若靠家己的好行為煞開始犯罪，伊所有的好行為我𣍐給伊記啲。伊會因為所做的歹來死。 |
| 33:14 | 我曾對歹人講『你一定會死』，毋拘伊若悔改離開歹，做公平正義的事； |
| 33:15 | 譬喻講，將伊偷來抑是別人抵押的物件還互原主，遵守賜性命的律法，無閣做歹，伊一定會得著性命，𣍐死。 |
| 33:16 | 我𣍐給伊任何的罪記啲；伊欲因為所做公平正義的事，性命得著保存。 |
| 33:17 | 「你的同胞講『主按呢處理無公道』。其實，𪜶才是無公道。 |
| 33:18 | 義人無閣做好事，顛倒去做歹，𪜶一定會因為按呢來死。 |
| 33:19 | 歹人若悔改無閣作歹，做公平正義的事，伊欲因為按呢保存性命。 |
| 33:20 | 恁猶啲講『主按呢處理無公道』。以色列人啊，我欲照恁逐個人的行為給恁審判。」 |
| 33:21 | 耶路撒冷淪陷的消息 第十二年十月初五，有一個對耶路撒冷逃走出來的人來我遮。伊給我講，耶路撒冷城已經淪陷。 |
| 33:22 | 此個人來的前一暗，上主的氣力充滿我，互我會閣講話。第二日早起，此個人來我遮以前，我的嘴已經開，開始會講話。 |
| 33:23 | 人民的罪 上主對我講： |
| 33:24 | 「人子啊，住佇以色列荒廢的城的人民講：『亞伯拉罕一個人就得著此塊土地，咱人數即多，此塊土地閣較會用得互咱做產業。』 |
| 33:25 | 「你著給𪜶講，我 — 至高的上主按呢講：『恁食含血的肉，拜偶像，閣刣死人，猶想欲得著此塊土地做產業噢？ |
| 33:26 | 恁靠刀劍過日子，做通厭惡的事，人人犯姦淫，猶敢想欲得著此塊土地做產業？』 |
| 33:27 | 「你著閣給𪜶講：『我 — 至高的上主指家己的活命立誓：恁住佇荒廢的城的人民欲互人刣死，住佇野外的人欲互野獸吞食，匿佇堡壘抑是洞內的人欲致著瘟疫死去。 |
| 33:28 | 我欲互此塊地徹底拋荒；𪜶所誇耀的攏欲消失。以色列的山欲荒廢，無人經過。』 |
| 33:29 | 我因為𪜶所做一切通厭惡的事給𪜶刑罰，互土地拋荒的時，𪜶就知我是上主。」 |
| 33:30 | 先知傳講信息的結果 上主講：「人子啊，你的同胞佇城牆邊，佇厝門口談論你。𪜶互相講來講去：『來，咱來聽看上主會講什麼！』 |
| 33:31 | 𪜶歸陣做夥來，親像欲來聚會，坐佇你的面前，假若是我的子民。𪜶聽是聽，毋拘無去行。𪜶的嘴攏啲強調疼，毋拘𪜶的心啲想不義之財。 |
| 33:32 | 佇𪜶的心目中，你不過是聲音媠，𠢕唱情歌，閣會曉彈琴的歌手。你的話，𪜶此耳聽，彼耳出，攏無去做。 |
| 33:33 | 毋拘你講的話真緊就會實現；你的話實現的時，𪜶就知，曾有先知佇𪜶中間。」 |