| 章節 | 現代台語漢字2021版經文 |
| 24:1 | 生銹的銅鍋 第九年十月初十，上主對我講： |
| 24:2 | 「人子啊，你著為今仔日此個特別的日子做記錄，因為今仔日巴比倫王開始圍攻耶路撒冷。 |
| 24:3 | 你著向此個背逆的子民講譬喻，給𪜶講：『至高的上主按呢講：
給鍋仔下佇火頂面， 下好勢，倒水佇鍋仔內面。 |
| 24:4 | 將切做一塊一塊上好的肉，
就是肩頭肉及腿肉， 及上好的骨頭，給鍋仔貯滿滿； |
| 24:5 | 取羊群中上好的羊仔。
將柴囥佇鍋仔下面， 給許個骨頭及肉煮互滾。 |
| 24:6 | 「『至高的上主按呢講：慘啊，此個流人的血的城，生銹毋曾鑢過的鍋仔！內面的肉毋免抽籤揀，著一塊一塊攏給夾出來。 |
| 24:7 | 此個城猶有刣人流出的血；血摒佇光滑的石磐頂面，毋是倒佇土腳，會當用土蓋。 |
| 24:8 | 是我互此個城將刣人流出的血摒佇光滑的石磐頂面；𣍐當用土蓋，是欲激動我的受氣，給𪜶報應。 |
| 24:9 | 「『所以，至高的上主按呢講：慘啊，此個流人的血的城！我欲親身疊一大堆柴。 |
| 24:10 | 添較多樹椏，互火較焰，給肉煮互爛，湯炕甲焦去，連骨都臭火焦！ |
| 24:11 | 了後，將空的鍋仔下佇火頂面，互鍋仔熱，給銅燒紅，互內面的垃屑熔去，鍋仔就無閣有銹。 |
| 24:12 | 毋拘所有的勞碌攏無採工，鍋仔厚厚的銹用火嘛除𣍐去。 |
| 24:13 | 耶路撒冷啊，鍋仔的銹就是你的淫行。我想欲給你洗清氣，毋拘你毋肯。所以，佇我對你發大受氣以前，你的垃屑𣍐當除去。 |
| 24:14 | 我上主曾講：我採取行動的時機到啦。我𣍐改變心意，無欲憐憫，嘛無欲寬容。我欲照你的所行所做給你審判。至高的上主按呢宣告。』」 |
| 24:15 | 先知的某死 上主對我講： |
| 24:16 | 「人子啊，我欲互你心愛的人忽然死去，毋拘你𣍐用得哀傷、啼哭，嘛𣍐用得流目屎。 |
| 24:17 | 你通恬恬仔吐氣，毋拘𣍐用得給伊辦喪事。你著縛頭巾，腳穿鞋；毋通掩嘴鬚表示哀傷，毋通食為著喪家準備的食物。」 |
| 24:18 | 彼早起我給人講此個事，彼暝我的某就死去。隔早起，我照上主的命令去做。 |
| 24:19 | 人問我：「你哪無欲給阮講，你做諸個代誌對阮有什麼意思？」 |
| 24:20 | 我給𪜶講：「上主對我講話， |
| 24:21 | 叫我給以色列人講：『至高的上主按呢講：恁將聖殿當做上誇耀的倚靠、目睭所意愛、心靈的寄託，毋拘我欲互我的聖殿受褻瀆。恁留佇耶路撒冷的子查某子攏欲互人刣死。 |
| 24:22 | 彼時，恁欲照我所做的去做。恁毋通掩嘴鬚表示哀傷，毋通食為著喪家準備的食物； |
| 24:23 | 恁嘛著縛頭巾，腳穿鞋，毋通哀傷啼哭。恁欲因為家己的罪惡衰荏，面對面哼哼呻。 |
| 24:24 | 上主講：以西結就是恁的兆頭；伊做的，恁嘛攏欲做。到彼時，恁就知我是至高的上主。』」 |
| 24:25 | 上主講：「人子啊，彼日我欲拆毀恁倚靠的堡壘、誇耀的榮光、目睭意愛的聖殿，嘛欲刣死恁的子查某子； |
| 24:26 | 仝彼日，對耶路撒冷逃走出來的人欲來你遮，給你講諸個代誌。 |
| 24:27 | 彼日，你無閣恬恬𣍐講話；你欲開嘴對諸個逃脫的人講話。按呢，你欲成做𪜶的兆頭，𪜶就知我是上主。」 |