| 章節 | 現代台語漢字2021版經文 |
| 16:1 | 不忠的耶路撒冷 上主閣對我講： |
| 16:2 | 「人子，你著互耶路撒冷知伊所做通厭惡的事。 |
| 16:3 | 著給耶路撒冷講，至高的上主按呢講：『你的本居地，你出世的所在，是迦南人的地。你的老父是亞摩利人，老母是赫人。 |
| 16:4 | 你出世的時，無人給你轉臍，用水給你洗清氣，嘛無人用鹽給你拭身軀，用布給你包啲。 |
| 16:5 | 無人可憐你，來給你做諸個代誌。你出世的時，互人㧒佇田野，因為你互人討厭。 |
| 16:6 | 「『我行路對你遐經過，看著你佇血中蟯蟯動；我對你講：雖然你歸身軀攏是血，毋拘你著活落去，著活落去！ |
| 16:7 | 我栽培你，親像啲照顧園裡的農作物。你漸漸大漢，發育成做少女，兩粒奶結實，頭毛長，毋拘猶原赤身露體。 |
| 16:8 | 「『我對你遐經過，看你已經成熟，會談情說愛。我用外衫遮蓋你無穿衫的身軀，及你立誓結盟約；我 — 至高的上主及你結約，你就歸屬我。 |
| 16:9 | 「『我用水給你身軀的血洗清氣，閣用油給你抹。 |
| 16:10 | 我互你穿繡花的媠衫、高級的皮鞋、幼麻布的頭巾，閣給你穿絲綢的外套。 |
| 16:11 | 我給你梳粧打扮，給你掛手環、袚鍊、 |
| 16:12 | 鼻環、耳鉤，用花冠給你戴。 |
| 16:13 | 按呢，你有金銀的妝飾，穿幼麻、絲綢，及繡花的媠衫。你用上好的麵粉、芳蜜，及橄欖油做食物。你生做真媠，媠甲會當做女王。 |
| 16:14 | 因為我 — 至高的上主給你妝飾，互你極媠。你的美貌就傳遍列國。 |
| 16:15 | 「『毋拘你靠勢家己的美貌及名聲去做娼妓，放縱情慾，及逐個過路的人行淫。 |
| 16:16 | 你用你的衫妝飾山頭壇，佇遐行淫。唉，此款代誌無應該有，將來嘛無應該發生。 |
| 16:17 | 你提我互你貴重的金銀珠寶，鑄造查甫人的像，親像妓女及𪜶行淫。 |
| 16:18 | 你用我互你繡花的媠衫給𪜶幔啲，閣給我互你的油及芳料獻互𪜶。 |
| 16:19 | 你閣將我互你的糧食，就是上好的麵粉、橄欖油、芳蜜，提去做芳芳的祭物獻互𪜶。代誌就是按呢。至高的上主按呢講。 |
| 16:20 | 「『你甚至將你及我生的後生、查某子當做祭物獻互偶像。你家己的淫亂猶無夠是無？ |
| 16:21 | 你閣刣我的兒女當做祭物用火燒，獻互𪜶。 |
| 16:22 | 你做妓女及做通厭惡的事，給你細漢的時赤身露體，佇血中蟯蟯動的情況攏放𣍐記得。』」 |
| 16:23 | 耶路撒冷親像淫婦 「至高的上主繼續講：『你慘啊！你有災禍啦！你做諸個歹代以外， |
| 16:24 | 閣佇城內起造花樓，佇寬闊的所在起拜偶像的高台。 |
| 16:25 | 你佇街頭巷尾起造高台，互你的美貌變做通厭惡的；你閣放縱情慾，及所有過路的人行淫。 |
| 16:26 | 你及好色的厝邊埃及行淫；你放縱情慾來惹我受氣。 |
| 16:27 | 「『所以，我欲伸手刑罰你，收回我互你的福分。我欲將你交互怨恨你的非利士人，隨在𪜶對待你；連𪜶嘛因為你的淫亂感覺見笑。 |
| 16:28 | 「『毋拘，你猶無滿足，閣及亞述行淫；按呢嘛猶無滿足你淫亂的慾望。 |
| 16:29 | 你閣及𠢕做生理的巴比倫行淫；就是按呢，你猶原無滿足。』 |
| 16:30 | 「至高的上主閣講：『你實在互我非常受氣！你做諸個代誌親像毋知見笑的妓女做的。 |
| 16:31 | 你佇路頭造花樓，佇廣場起高台，佇遐行淫。你比妓女較毋值，因為你無欲提人的錢； |
| 16:32 | 你是淫婦，寧可及外人私通，無愛家己的丈夫。 |
| 16:33 | 妓女是給人提禮物，你顛倒送禮物互愛人；你引誘𪜶對逐所在來滿足你的情慾。 |
| 16:34 | 你及一般的妓女無像款，毋是人來尋你行淫，是你去尋人；你無收人的錢，顛倒倒貼。你及其他的妓女顛倒反。』」 |
| 16:35 | 上主審判耶路撒冷 今，你此個淫婦耶路撒冷，著聽上主的話。 |
| 16:36 | 至高的上主講：「你放縱情慾，為愛人露現你的下體及𪜶行淫，閣刣家己的兒女做祭物，獻互通厭惡的偶像。 |
| 16:37 | 所以，我欲給你所有的愛人，無論是你合意的抑是討厭的，對逐所在召集來攻擊你；我欲佇𪜶的面前給你褪光光，互𪜶給你歸身軀看了了。 |
| 16:38 | 我欲審判你，親像審判行淫及刣人的查某人。我欲佇大受氣及怨妒中給你刑罰，給你處死。 |
| 16:39 | 我欲將你交佇𪜶的手；𪜶欲拆毀你的花樓，毀壞你的高台，剝你的衫，搶你的珠寶，互你赤身露體。 |
| 16:40 | 「𪜶欲導群眾來攻擊你，用石頭給你抌死，用刀劍給你剁碎。 |
| 16:41 | 𪜶欲放火燒你的厝，佇真多婦女的面前給你刑罰。我無欲互你閣做妓女，了錢倒貼愛人。 |
| 16:42 | 按呢，我的大受氣才會消，我的怨妒才會煞；我才會平靜，無閣受氣。 |
| 16:43 | 你𣍐記得細漢的時我按怎對待你，顛倒做諸個事惹我受氣，所以我欲照你的所做報應你。你已經做赫多可惡的事，是按怎欲閣行淫？」至高的上主按呢宣告。 |
| 16:44 | 有其母必有其女 上主講：「若有人欲用俗語給你睥相，一定會講：『有其母必有其女。』 |
| 16:45 | 你真正及你的老母像款，棄拺家己的丈夫及子兒。你嘛及你的姊妹像款，棄拺家己的丈夫及子兒。你的老母是赫人，老父是亞摩利人。 |
| 16:46 | 「你的大姊是撒馬利亞；伊及伊的查某子住佇你的北旁。你的小妹是所多瑪；伊及伊的查某子住佇你的南旁。 |
| 16:47 | 你學𪜶的所做，做通厭惡的事，毋若按呢，無偌久，你佇逐方面攏比𪜶閣較歹。」 |
| 16:48 | 至高的上主閣講：「我指我的性命立誓：你的小妹所多瑪及伊的查某子無做你及你的查某子所做的歹事。 |
| 16:49 | 看咧，你的小妹所多瑪的罪是按呢：伊及伊的查某子的罪是驕傲，就是𪜶食物充足，安穩過好日子，毋拘無照顧困苦及散赤的人。 |
| 16:50 | 𪜶驕傲，做我看做厭惡的事，所以我給𪜶消滅。此項事你已經知。 |
| 16:51 | 「撒馬利亞犯的罪較無你的一半。你所做可惡的事比𪜶閣較多。你所做可惡的事煞互你的姊妹比你較正直。 |
| 16:52 | 你既然為著你的姊妹辯護，今你著承擔家己的見笑，因為你犯的罪比𪜶閣較可惡，煞互𪜶比你較正直。今你著知通見笑，因為你互你的姊妹看起來比你好真多。」 |
| 16:53 | 所多瑪及撒馬利亞欲復興 上主對耶路撒冷講：「我欲互所多瑪及撒馬利亞以及𪜶的查某子，對受掠的地倒轉來，嘛欲互你及𪜶做夥倒轉來； |
| 16:54 | 按呢，你才會曉因為所受的侮辱來感覺見笑，互你的姊妹得著安慰。 |
| 16:55 | 所多瑪及撒馬利亞以及𪜶的查某子欲回復早前的盛況。你及你的查某子嘛一定會按呢。 |
| 16:56 | 佇你奢颺、罪惡猶未顯露的時，你豈毋是曾恥笑所多瑪？今，你欲互以東人、非利士人，及周圍怨恨你的人給你恥笑。 |
| 16:57 | 併於上節 |
| 16:58 | 你欲為著家己的淫亂及所做可惡的事受報應。」上主按呢宣布。 |
| 16:59 | 永遠的約 至高的上主講：「我欲照你的行為報應你，因為你違背對我咒誓的話，廢除及我立的約。 |
| 16:60 | 雖然是按呢，我欲記牢我佇你少年的時及你立的約，閣堅立伊成做永遠的約。 |
| 16:61 | 你接納你的大姊小妹的時，欲想起你以前所做的一切來感覺見笑。雖然我無按呢及恁約定，我欲給𪜶交互你，做你的查某子。 |
| 16:62 | 我欲堅立我及你立的約，你就知我是上主。 |
| 16:63 | 我欲赦免你所犯一切的罪過，互你會記得諸個事來感覺見笑，毋敢閣開嘴。」至高的上主按呢宣布。 |