| 章節 | 現代台語漢字2021版經文 |
| 9:1 | 上帝及挪亞立約 上帝賜福挪亞及伊的子，對𪜶講：「著生湠，加添真多，充滿全地。 |
| 9:2 | 地上所有的野獸、天頂的飛鳥、地面啲爬的動物，及海裡的魚類攏會驚恁，畏恁，受恁管理。 |
| 9:3 | 我將所有活的動物，親像菜蔬仝款互恁做食物。 |
| 9:4 | 毋拘有性命的肉，就是有含血的肉，恁毋通食。 |
| 9:5 | 流恁的血的人，就是殺害恁性命的人，我欲給𪜶處死；我欲將害恁性命的野獸、人，甚至恁的同胞處死。
|
| 9:6 | 所有流人的血的人，
人嘛欲流伊的血； 因為上帝照伊家己的形像造人。 |
| 9:7 | 恁著生湠真多，
佇地上興旺，加添真多。」 |
| 9:8 | 上帝給挪亞及伊的子講： |
| 9:9 | 「今，我及恁以及恁的後代立約； |
| 9:10 | 嘛及許個及恁做夥，對大船出來的活物，包括飛鳥、牲生、野獸立約。 |
| 9:11 | 我及恁立約：所有有肉體的生物，𣍐閣互大水消滅，嘛𣍐閣有大水毀壞全地。」 |
| 9:12 | 上帝閣講：「我欲及恁，以及所有及恁做夥的生物立永遠的約；我欲互虹出現佇雲裡，做立約的記號。 |
| 9:13 | 併於上節 |
| 9:14 | 我互雲遮地，虹出現佇雲裡的時， |
| 9:15 | 我就記念我及恁以及逐款有肉體的生物所立的約，𣍐閣互水氾濫，毀滅所有的生物。 |
| 9:16 | 我看著虹佇雲裡出現，就記念我及地上逐款有肉體的生物所立永遠的約。」 |
| 9:17 | 上帝對挪亞講：「這就是我及地上逐款有肉體的生物立約的記號。」 |
| 9:18 | 挪亞及伊的子 挪亞的子，對大船出來的，就是閃、含、雅弗；含是迦南的老父。 |
| 9:19 | 此三個是挪亞的子；𪜶的後代分散去全世界。 |
| 9:20 | 挪亞是第一個栽種葡萄的作穡人。 |
| 9:21 | 挪亞飲酒醉，佇布棚內赤身露體。 |
| 9:22 | 迦南的老父含看著𪜶老父赤身露體，去給佇外面兩個兄弟講。 |
| 9:23 | 閃及雅弗提一領衫，靠佇𪜶的肩頭頂，倒退行，遮𪜶老父的身軀；𪜶的面向外面，無看著𪜶老父赤身露體。 |
| 9:24 | 挪亞酒醉醒，才知細漢子的所做， |
| 9:25 | 就講：
迦南著受咒詛； 伊欲做伊的兄弟上卑賤的奴隸。 |
| 9:26 | 挪亞閣講：
著謳咾上主 — 閃的上帝； 迦南欲做閃的奴隸。 |
| 9:27 | 願上帝互雅弗擴展，
互伊住佇閃的布棚； 迦南做𪜶的奴隸。 |
| 9:28 | 大水了後，挪亞猶活三百五十年。 |
| 9:29 | 挪亞總共活九百五十歲才死。 |