| 章節 | 現代台語漢字2021版經文 |
| 9:1 | 耶路撒冷受刑罰 了後，我聽見上帝大聲喝：「恁諸個負責刑罰此個城的人，來！逐個人帶刣人的武器來！」 |
| 9:2 | 隨時有六個人，逐個帶刣人的武器，對聖殿外埕的北門過來，其中有一個穿幼麻布做的衫，腰有寫字的筆及墨。𪜶進前來，徛佇銅的祭壇邊。 |
| 9:3 | 本來停佇天使基路伯頂面的以色列上帝的榮光，升高到聖殿的入口。上帝叫彼個穿幼麻布的衫、腰帶筆墨的人來。 |
| 9:4 | 上主對伊講：「你去，行透全耶路撒冷城，給許個為著城內所發生通厭惡的歹事啲吐氣啼哭的人的頭額做記號。」 |
| 9:5 | 我閣聽見上主對其他的人講：「恁著隨伊的後面，行透全城，下手刣人；毋免可憐，毋免疼惜𪜶。 |
| 9:6 | 無論是老人、少年人、少女、婦女及囝仔，攏著刣死；毋拘毋通刣許個頭額有記號的人。對我的聖所開始下手！」按呢，𪜶下手刣佇聖殿頭前的長老。 |
| 9:7 | 伊對𪜶講：「著給聖殿的埕堆滿屍體，拍垃墋聖殿。現在就開始！」𪜶就出去，開始佇城裡刣人。 |
| 9:8 | 𪜶佇城裡啲刣人的時，我一個人留佇聖殿。我面仆佇土腳哀求，講：「至高的上主啊，你真正欲將你的受氣摒落佇耶路撒冷，給以色列所賰的人攏消滅是無？」 |
| 9:9 | 伊應講：「以色列人及猶大人罪大惡極。全國逐所在攏有刣人流血的事件；耶路撒冷充滿不義。𪜶講：『上主已經棄拺此塊土地，伊攏無啲插阮。』 |
| 9:10 | 所以，我無欲可憐，無欲疼惜𪜶。𪜶按怎對待別人，我嘛欲按呢對待𪜶。」 |
| 9:11 | 後來，彼個穿幼麻布的衫、腰帶筆墨的人轉來，將諸個事向上主報告，講：「我已經照你的命令去做啦。」 |