| 章節 | 現代台語漢字2021版經文 |
| 6:1 | 上主責備拜偶像 上主給我講： |
| 6:2 | 「人子啊，著面向以色列的眾山，傳達我的信息，講： |
| 6:3 | 『以色列的眾山啊，著聽至高上主的話。至高的上主對大山、小山、山溝、山谷按呢講：我欲用刀劍毀滅恁的山頭壇。 |
| 6:4 | 祭壇欲受拆毀，香壇受拍碎，受刣死的人欲倒佇恁的偶像的頭前。 |
| 6:5 | 我欲給以色列人的身屍㧒佇𪜶的偶像的頭前，將恁的骨骸撒散佇恁的祭壇四周圍。 |
| 6:6 | 無論恁住佇什麼所在，恁的城鎮攏欲變做荒埔，山頭壇拋荒致到祭壇荒廢，偶像受拍碎毀滅，香壇受斬斷。恁所造的一切攏欲受除滅。 |
| 6:7 | 受刣的人倒佇恁中間，恁就知我是上主。 |
| 6:8 | 「『我欲給恁留一寡人，互𪜶逃脫列國的刀劍，分散去逐所在。 |
| 6:9 | 彼時，許個脫離刀劍的人，佇受放逐的所在欲想起我，了解我因為𪜶的不忠、背逆，以及心目戀慕偶像來心艱苦。𪜶會因為家己所做邪惡的歹事厭惡家己。 |
| 6:10 | 𪜶欲明白我是上主，我講欲降災禍互𪜶，毋是講假的。』」 |
| 6:11 | 至高的上主按呢講：「你著𬧋腳頓手，講：『慘啦，以色列因為做邪惡及做互人厭惡的事，欲死佇戰爭、枵餓，及瘟疫。』 |
| 6:12 | 佇遠遠的所在的人欲因為瘟疫來死；佇附近的人欲因為戰亂來死；留落來的人欲因為飢荒來死。我欲佇𪜶身上摒盡我的大受氣。 |
| 6:13 | 「𪜶受刣的人的身屍欲四散佇𪜶的偶像中間，佇𪜶的祭壇四周圍，佇每一座大山、小山的頂面，佇每一欉青翠的樹及茂盛的橡樹腳，就是𪜶曾向偶像獻芳芳的祭的所在。按呢，𪜶就知我是上主。 |
| 6:14 | 我一定欲出手攻擊𪜶。我欲互𪜶的地荒廢，對南方的曠野一直到北方的第伯拉城；以色列人住的所在攏欲拋荒。按呢，𪜶就知我是上主。」 |