| 章節 | 現代台語漢字2021版經文 |
| 2:1 | 上主刑罰耶路撒冷 唉啊！上主竟然發大受氣，互錫安見笑！ 伊將以色列的榮華對天㧒落地； 佇伊受氣的日， 連家己的腳砧，聖殿，伊嘛無顧念。 |
| 2:2 | 上主毀滅雅各攏總的草埔，
一屑仔都無憐憫。 伊發大受氣，拆毀猶大的堡壘， 互猶大及伊的領袖徹底受凌辱。 |
| 2:3 | 伊發大受氣，消滅以色列所有的氣力；
對敵來的時，伊毋伸手保護。 伊親像火焰吞滅雅各， 將伊所有的攏燒毀。 |
| 2:4 | 伊親像對敵向我開弓，
親像敵人用箭射我。 伊將阮勇壯的少年人攏刣死； 伊的大受氣發出，親像火燒毀錫安的布棚。 |
| 2:5 | 上主親像對敵，毀滅以色列；
伊拆毀以色列的宮殿， 互堡壘荒廢； 伊加添猶大人民的悲傷及哀哭。 |
| 2:6 | 伊毀壞伊家己徛起的所在，親像毀壞園仔；
伊拆毀聖殿。 上主互錫安的人𣍐記得節期及安歇日； 伊佇大受氣中棄拺君王及祭司。 |
| 2:7 | 上主放棄家己的祭壇，
放拺伊的聖所； 伊將宮殿的圍牆交互對敵，出在𪜶拆毀。 𪜶佇上主的殿內， 大聲喧嘩，親像啲過節。 |
| 2:8 | 上主決定欲拆毀錫安的城牆；
伊扭準繩，欲破壞； 伊的手無閣收回。 伊互城樓及城牆哀哭， 做夥倒壞。 |
| 2:9 | 錫安的城門已經埋佇土裡；
上主摃斷城門的門閂。 君王及領袖攏受放逐去列國。 錫安無人講解律法； 先知無閣對上主得著異象。 |
| 2:10 | 錫安的長老坐佇土腳，
恬恬無出聲。 𪜶撒土沙粉糝頭殼，身軀穿麻衫； 耶路撒冷的少女頭犁犁䪴到土腳。 |
| 2:11 | 我的目睭因為流目屎失明，
我的腸仔攪絞， 我的五臟消熔； 我的同胞受剿滅， 囝仔及嬰仔暈倒佇城內的廣場。 |
| 2:12 | 𪜶親像受傷的戰士暈倒佇廣場，
佇老母的胸前慢慢斷氣； 𪜶問老母，講： 有什麼通食無？有什麼通飲無？ |
| 2:13 | 耶路撒冷，我會當替你講什麼？
我會當用什麼比並你？ 錫安，我通用什麼及你比較來安慰你？ 你的孔嘴親像海赫呢大， 啥人會當給你醫治？ |
| 2:14 | 你的先知看見的是無影跡、騙人的異象；
𪜶毋曾指出你的罪， 互你悔改，毋免受掠； 𪜶傳互你的是虛假、行迷路的默示。 |
| 2:15 | 所有的過路人攏拍噗仔，
幌頭恥笑耶路撒冷，講： 這豈是人啲講彼個十全十美的城？ 這豈是全世界的人攏啲謳咾的城？ |
| 2:16 | 所有的對敵攏給你睥相；
𪜶恥笑你，咬牙切齒講： 阮已經將伊吞滅啦！ 阮就是啲聽候此日！ 今阮親目看著啦！ |
| 2:17 | 上主已經完成伊的計劃，
實現伊早前定著的警告； 伊拆毀，一屑仔都無留情。 伊互對敵對你誇口， 互𪜶耀武揚威。 |
| 2:18 | 著對心底求叫主！
耶路撒冷的城牆啊， 願你的目屎親像江河直直流，暝日無停！ 願你的目睭流目屎無歇睏！ |
| 2:19 | 著佇逐暗換更的時起來求叫；
向上主吐露你的心聲親像摒水； 著攑雙手為著恁的囝仔的性命祈禱， 𪜶佇街路枵甲啲欲死去。 |
| 2:20 | 上主，求你看，
看你豈曾按呢給人責罰過？ 婦仁人豈通食家己所生所養飼的嬰仔？ 祭司及先知哪通佇上主的聖殿受殺害？ |
| 2:21 | 少年人及老人攏倒佇街路；
少女及青年人攏死佇刀下。 你佇受氣的日給𪜶刣死， 一屑仔都無留情。 |
| 2:22 | 你對四面召集我的對敵，
親像叫人來過節。 佇上主受氣的日， 無人會當逃脫， 會當保存性命； 對敵刣死我所有養育的兒女。 |