| 章節 | 現代台語漢字2021版經文 |
| 49:1 | 有關亞捫人 關係亞捫人，上主按呢講： 「以色列攏無人是無？ 恁攏無人通繼承產業是無？ 是按怎互拜米勒公的人侵佔迦得支族的土地， 住佇許個城？ |
| 49:2 | 「上主講：
看咧，時日一下到， 亞捫人的首都拉巴會傳出交戰的聲， 拉巴會變做荒廢的土堆； 𪜶的城鎮會互火燒。 以前𪜶侵佔以色列， 現在以色列會對𪜶收回國土。 |
| 49:3 | 希實本人，著哀哭，
因為艾城變做荒埔。 拉巴的住民，著喉叫， 提麻布縖腰； 著啼哭，佇城牆內四界闖； 因為米勒公及伊的祭司，以及官員會做一下互人掠去。 |
| 49:4 | 背叛的子民啊，
恁是按怎啲誇口家己的氣力？ 恁的氣力已經漸漸衰退， 哪猶啲倚靠家己的財寶，想講無人會來侵犯？ |
| 49:5 | 至高上主 — 萬軍的統帥按呢講：
看咧，恁會互對周圍國家來的恐怖包圍； 恁欲逃走，隨人顧性命， 無人會當給諸個四散的難民聚集起來。 |
| 49:6 | 「毋拘，後來我會互受掠的亞捫人倒轉來。」上主按呢宣布。 |
| 49:7 | 有關以東 關係以東，上主 — 萬軍的統帥按呢講： 「佇提幔𣍐當閣尋著智慧是無？ 明理的人無法度通提供好的建議是無？ 𪜶的智慧攏無去是無？ |
| 49:8 | 底但的住民啊，趕緊撤退逃走，
去匿起來； 我刑罰以掃的時到啦， 我欲降災禍互伊。 |
| 49:9 | 挽葡萄的若去你遐，豈𣍐留淡薄？
賊若暝時來偷，豈毋是提𪜶所愛的物若定？ |
| 49:10 | 毋拘我欲給以掃剝甲光溜溜；
伊隱密的所在會露現，無所在通匿； 伊的後代、親族、厝邊攏會受消滅， 無賰半個。 |
| 49:11 | 著將恁的孤兒放互我，
我會保全𪜶的性命； 恁的寡婦嘛著倚靠我。」 |
| 49:12 | 上主講：「你看，連許個無應該受刑罰的嘛著飲刑罰的杯，你豈會當免受刑罰？無可能！你一定著飲。 |
| 49:13 | 我指家己立誓，波斯拉會變做荒廢的所在，受凌辱，受咒詛，互人著驚；附近的城鎮嘛會永遠拋荒。」上主按呢宣布。
|
| 49:14 | 我對上主遐聽著消息，
伊差使者去列國，講： 「恁著聚集來攻擊以東，及伊交戰。」 |
| 49:15 | 上主對以東講：
「我欲互你佇列國中變做弱小， 互世間人看輕。 |
| 49:16 | 恁住佇石洞內，佇山頂啲顧守，
雖然親像鷹鳥作巢佇高的所在， 我嘛欲對遐給你拖落來； 你毋通互家己的聲勢，心內的驕傲騙去。」 上主按呢宣布。 |
| 49:17 | 上主講：「以東會互人卬愕，對遐經過的人攏會著驚，閣因為伊抵著的災禍給伊恥笑。親像所多瑪、蛾摩拉及附近的城鎮倒壞，以東嘛會按呢受毀滅，𣍐閣有人住，嘛𣍐閣有人佇遐寄居。 |
| 49:18 | 併於上節 |
| 49:19 | 我欲親像獅對約旦河邊的樹林出來，去攻擊青翠草埔的羊群，真緊給𪜶趕走，離開𪜶的國土。我揀選什麼人，就派伊統治此個國家。啥人會當及我比？啥人敢傳我出庭？叨此個統治者敢對抗我？ |
| 49:20 | 恁著聽上主攻擊以東及提幔住民的計劃；𪜶連上弱小的都會互人拖去。我一定會互𪜶徛起的所在荒廢。 |
| 49:21 | 以東倒壞的聲會互地大振動；人喝咻的聲會迵到紅海。 |
| 49:22 | 伊的對敵會親像鷹鳥搋翼衝落來攻擊波斯拉；彼時，以東戰士的心會親像催陣的婦仁人赫呢痛疼。」 |
| 49:23 | 有關大馬士革 關係大馬士革，上主講： 「哈馬及亞珥拔的人非常不安； 𪜶聽著歹消息就失膽， 親像海湧浪浪滾，𣍐平靜。 |
| 49:24 | 大馬士革的人失去勇氣，
𪜶越轉身欲逃走， 煞互痛苦憂愁擒牢牢， 親像催陣的婦仁人仝款。 |
| 49:25 | 此個互人謳咾的城，我所歡喜的城，
是按怎會受放拺，完全拋荒？ |
| 49:26 | 𪜶的少年人會佇廣場互人刣死；
仝彼日，𪜶的戰士會互人剿滅。 我欲放火燒大馬士革的城牆， 燒毀便‧哈達的宮殿。」 上主 — 萬軍的統帥按呢宣布。 |
| 49:27 | 併於上節 |
| 49:28 | 有關基達及夏瑣 關係互巴比倫王尼布甲尼撒拍敗的基達及夏瑣許個國家，上主按呢給巴比倫人講： 「起來，上去攻擊基達， 剿滅許個東方的人。 |
| 49:29 | 去搶𪜶的布棚及羊群，
以及𪜶的帳幕及所有的工具； 駱駝嘛攏給搶去； 著給𪜶喝講：『恁互恐怖包圍啦！』 |
| 49:30 | 「上主講：
夏瑣的住民，著趕緊逃走， 走去遠閣深的所在匿起來； 因為巴比倫王尼布甲尼撒設計欲害恁， 決定欲攻擊恁。 |
| 49:31 | 「上主閣講：
起來！去攻擊許個無掛無慮安然徛起的人， 𪜶無城門，無門閂， 是家己單獨徛起的住民。 |
| 49:32 | 𪜶的駱駝會互人搶去；
𪜶多多牲生會互人劫去； 我欲給所有剃鬢邊的人趕散去逐所在； 我欲對四周圍降災禍互𪜶。 夏瑣會成做豺狼住的所在， 永遠荒廢，無人徛起， 嘛無人佇遐寄居。」 上主按呢宣布。 |
| 49:33 | 併於上節 |
| 49:34 | 有關以攔 猶大王西底家抵坐位的時，關係以攔，上主的話臨到先知耶利米。 |
| 49:35 | 上主 — 萬軍的統帥按呢講：「看咧，我欲遏折以攔人的弓，這是𪜶相戰的時上主要的武力。 |
| 49:36 | 我欲互風對天的四面吹來，給以攔人趕散去逐所在；全地逐國攏有以攔的難民。 |
| 49:37 | 上主閣講：我欲互以攔人佇數想𪜶的性命的對敵面前驚惶；我欲對𪜶發受氣，降災禍互𪜶，閣欲用戰爭給𪜶徹底消滅。 |
| 49:38 | 上主講：我欲消滅以攔的君王及官員，佇遐設立我的寶座。 |
| 49:39 | 毋拘將來有一日，我欲互以攔受掠的人倒轉來。」上主按呢宣布。 |