| 章節 | 現代台語漢字2021版經文 |
| 48:1 | 摩押的毀滅 關係摩押，上主 — 萬軍的統帥、以色列的上帝按呢講： 「尼波慘啊，伊會荒廢； 基列亭受侮辱，互人佔領， 伊的堡壘受毀壞，住民受凌辱。 |
| 48:2 | 摩押𣍐閣有燦爛的榮光；
有人佇希實本設計欲害摩押，講： 『來，咱來給消滅， 互伊𣍐當成做一國。』 瑪得緬城啊，著恬恬，毋通出聲； 有軍隊欲來攻擊你。 |
| 48:3 | 對何羅念傳出哀哭的聲：
『荒廢啦，攏總毀滅啦！』 |
| 48:4 | 「摩押受毀滅，
佇遐傳出囝仔啲哮的聲。 |
| 48:5 | 人𬦰魯希的山坪，
那𬦰那哭； 𪜶落何羅念的山坪， 聽著毀滅哀哭的聲： |
| 48:6 | 『著逃走，隨人顧性命，
親像曠野的野驢。』 |
| 48:7 | 「摩押啊，你靠家己的軍力及財富，
毋拘仝款會受征服。 你的神明基抹及伊的祭司，以及官員， 攏會受流放， 做一下受遷徙。 |
| 48:8 | 恁逐個城攏會受毀滅，
無一個城會當避免； 山谷受毀壞， 平原受踐踏。 上主按呢宣布。 |
| 48:9 | 「著給摩押鬥兩支翼，
互伊通飛走； 伊的城鎮會拋荒， 無人徛起。」 |
| 48:10 | 貧憚毋做上主的工的，會受咒詛；毋攑家己的刀去刣敵人的，會受咒詛。 |
| 48:11 | 摩押的城鎮倒壞 摩押對開國以來就真太平， 毋曾受放逐； 伊親像封密佇酒甕內的酒， 毋曾互人倒來倒去， 所以滋味原在，氣味無變。 |
| 48:12 | 上主講：「看咧，時日一下到，我欲派人給摩押倒挕拺，親像給酒倒掉仝款。𪜶會給酒倒甲空空空，閣給酒甕摔破。 |
| 48:13 | 摩押會因為伊的神明基抹見笑，親像以色列人為著𪜶所倚靠伯特利的神明見笑仝款。
|
| 48:14 | 摩押啊，你哪會當自稱是英雄，
是𠢕相戰的勇士？ |
| 48:15 | 摩押會受毀壞，
對敵佔領伊的城鎮； 特選的壯丁攏受刣死。 摩押的終局逼近啦， 伊的災難會緊緊到。」 大君王，上主 — 萬軍的統帥按呢宣布。 |
| 48:16 | 併於上節 |
| 48:17 | 「摩押周圍的國家，認識伊的民族啊，
恁攏著為摩押悲傷，講： 『伊的大權勢崩去， 伊的榮光無去啦！』 |
| 48:18 | 底本的住民啊，
著對你榮光的座位落來， 坐佇焦燥的土腳； 因為毀滅摩押的已經到， 伊欲拆毀你的堡壘。 |
| 48:19 | 亞羅珥的住民啊，
著徛佇路邊看， 問許個逃難的男女，講： 『到底發生什麼代誌？』 |
| 48:20 | 𪜶會應講：『摩押淪陷啦！』
恁著為伊哀傷啼哭； 著佇亞嫩河宣布，講： 『摩押滅亡啦！』 |
| 48:21 | 「審判已經臨到平原逐所在，就是摩押無論遠抑是近所有的城鎮，到佇何崙、雅雜、米法押、底本、尼波、伯‧低比拉太音、基列亭、伯‧迦末、伯‧米恩、加略、波斯拉。 |
| 48:22 | 併於上節 |
| 48:23 | 併於上節 |
| 48:24 | 併於上節 |
| 48:25 | 摩押的權勢無去，軍力全失啦！」上主按呢宣布。 |
| 48:26 | 摩押受凌辱 上主講：「恁著給摩押灌互醉；因為伊自高，背逆我；伊會佇家己吐出來的垃屑物中間翱來翱去，互人恥笑。 |
| 48:27 | 摩押啊，你豈毋是曾恥笑以色列？你逐遍講著以色列，豈毋是搖頭，給伊當做互人掠著的賊仔？
|
| 48:28 | 摩押人啊，著逃走離開城鎮，
去住佇山巖， 親像粉鳥佇隘口作巢。 |
| 48:29 | 猶大的人民講：
『聽講摩押人非常驕傲， 自高自大，驕傲到極； 家己掠做了不起。』 |
| 48:30 | 我知𪜶的自大是空虛，
所誇口的攏是膨風。」 上主按呢宣布。 |
| 48:31 | 所以，我為著摩押啼哭，
為著摩押全國啼哭； 人嘛欲為著吉珥‧哈列設的人哀傷。 |
| 48:32 | 西比瑪，我為著你哀哭，
比為雅謝哭閣較大聲。 你親像葡萄樹， 枝伸過大海， 旋到雅謝的海。 毋拘毀滅者來啦， 欲將你啲欲收成的果子及葡萄攏毀掉。 |
| 48:33 | 上主講：
「摩押肥的田園消失， 無閣有歡喜快樂的聲！ 我互酒窟無閣出酒， 無人佇遐踏酒出歡喜的聲； 雖然有喝的聲，毋拘毋是歡喜的聲。」 |
| 48:34 | 希實本人哀哭的聲傳到以利亞利，迵到雅雜；閣對瑣珥一直傳到何羅念，直到伊基拉‧施利施亞，因為連寧林的溪水都焦焦去。 |
| 48:35 | 上主講：「許個佇摩押的山頭壇獻祭，向𪜶的神明燒香的人，我攏欲給𪜶消滅。」 |
| 48:36 | 所以，我的心為著摩押悲傷，我的心腸為著吉珥‧哈列設哀傷，親像𥰔仔哀怨的聲。𪜶所積聚的財物攏失去啦。 |
| 48:37 | 𪜶逐個人剃光頭，剪嘴鬚，割傷手骨，腰縖麻布。 |
| 48:38 | 上主講：「摩押逐間厝的厝頂及廣場攏有啼哭的聲；因為我毀壞摩押，親像人摃碎無合意的器具。 |
| 48:39 | 恁著大聲啼哭！摩押完全毀滅啦！𪜶見笑無面通見人，成做四周圍的國家恥笑互人著驚的對象。」 |
| 48:40 | 摩押無路通逃走 上主講： 「看咧，有一個國家親像鷹鳥搋開伊的翼， 衝落來攻擊摩押。 |
| 48:41 | 摩押的城鎮及堡壘攏互伊佔去。
彼時，摩押戰士的心會親像催陣的婦仁人赫呢痛疼。 |
| 48:42 | 摩押受毀滅，無閣成做一個國家；
因為𪜶自高自大，背叛我上主。 |
| 48:43 | 摩押的住民啊，
恐怖、陷坑、活罩啲當等恁。」 上主按呢宣布。 |
| 48:44 | 「閃避恐怖的人會跋落陷坑；
對陷坑逃脫的人會互活罩罩著， 因為刑罰摩押的年已經定著。」 上主按呢宣布。 |
| 48:45 | 「許個逃難去希實本尋求保護的，𪜶的氣力已經用盡；
毋拘，有火對希實本發， 有火焰對西宏的城出， 燒盡摩押人的頭額， 及愛相刣的人的頭殼。 |
| 48:46 | 摩押啊，你有災禍啦！
拜基抹神明的人啊，恁滅亡啦！ 恁的後生互人掠去， 恁的查某子嘛做夥受掠。 |
| 48:47 | 毋拘上主嘛有講：將來我會互摩押受掠的人倒轉來。」 有關摩押受審判的話，到遮為止。 |