| 章節 | 現代台語漢字2021版經文 |
| 46:1 | 埃及佇迦基米施受拍敗 關係列國，上主的話臨到先知耶利米。 |
| 46:2 | 針對埃及：關係埃及王尼哥的軍隊，𪜶佇約西亞的子約雅敬作猶大王第四年，佇幼發拉底河河邊的迦基米施互巴比倫王尼布甲尼撒拍敗。
|
| 46:3 | 「著準備大細盾牌，
出陣交戰！ |
| 46:4 | 著套馬鞍，騎馬，
排隊，戴頭盔， 磨槍，穿戰甲！」 |
| 46:5 | 毋拘，上主講：
「是按怎我看著𪜶驚惶撤退？ 𪜶的勇士刣輸， 拼性命逃走，毋敢越頭； 四周圍充滿恐怖！ |
| 46:6 | 上𠢕走的嘛走𣍐離，
連勇士都𣍐當逃脫； 佇北方，幼發拉底河河邊， 𪜶攏跋倒𬦰𣍐起來。 |
| 46:7 | 此個親像尼羅河漲滿，
親像江河夯湧淐高的是什麼人？ |
| 46:8 | 是埃及！
伊親像尼羅河漲滿， 親像江河夯湧淐高； 伊講：『我欲漲滿， 欲淹滿全地； 我欲毀壞城鎮，消滅遐的住民。』 |
| 46:9 | 戰馬，衝啊！
戰車，突擊！ 夯盾牌的古實及弗的勇士， 開弓的呂底亞軍兵，衝出去！」 |
| 46:10 | 此日是至高上主 — 萬軍的統帥報仇的日，
伊欲刑罰敵人。 刀劍會吞食，食甲飽， 會飲血，飲甲滿足； 佇北方幼發拉底河河邊， 有祭物欲獻互至高上主 — 萬軍的統帥。 |
| 46:11 | 埃及人啊，
著去基列尋乳香！ 恁食即多藥仔攏無效， 𣍐當給恁醫好。 |
| 46:12 | 列國有聽著你受的凌辱；
全地充滿你哀哭的聲； 勇士及勇士相挵， 兩個做一下跋倒。 |
| 46:13 | 尼布甲尼撒攻打埃及 下面是關係巴比倫王尼布甲尼撒攻打埃及，上主對先知耶利米所講的話。 |
| 46:14 | 著佇埃及報揚，佇密奪宣布，
佇孟斐斯及答比匿宣布，講： 「著排陣，準備作戰！ 戰爭會吞滅恁一切所有的。」 |
| 46:15 | 恁的勇士是按怎跋倒？
因為上主給𪜶捙倒， 互𪜶徛𣍐牢。 |
| 46:16 | 𪜶戰敗四散，
大家相踐踏，互相講： 「起來！咱倒來去咱的本族， 轉來去咱的故鄉， 閃避欺壓者的刀劍。」 |
| 46:17 | 𪜶佇遐喝講：
「埃及王法老干焦會曉講大聲話； 伊已經失去伊的機會。」 |
| 46:18 | 大君王，上主 — 萬軍的統帥按呢講：
「我指我的性命立誓， 尼布甲尼撒來的時， 伊會親像超越眾山的他泊山， 親像佇海邊的迦密山。 |
| 46:19 | 埃及人啊，
著給受掠欲用的物件款好勢， 因為孟斐斯會受燒毀， 拋荒，無人徛起。 |
| 46:20 | 「埃及是肥閣媠的牛母，
毋拘對北方來的牛虻已經到啦！ 𪜶已經來啦！ |
| 46:21 | 埃及倩來的兵，親像椆內肥的牛仔，
𪜶攏撤退逃走， 毋敢繼續交戰； 因為𪜶患難的日來啦， 受刑罰的時已經到啦。 |
| 46:22 | 「埃及逃走，親像蛇啲趖發出聲；
敵人欲歸陣做夥來， 親像剉樹仔的人 攑斧頭給伊剉掉。 |
| 46:23 | 上主講：
伊的樹林雖然真艷， 敵人嘛會給剉了了； 因為敵人比草蜢較多，𣍐算得。 |
| 46:24 | 埃及的人民欲受侮辱見笑，
𪜶會互北方的人征服。」 |
| 46:25 | 上主 — 萬軍的統帥、以色列的上帝按呢講：「你看，我欲刑罰底比斯的神明亞捫，刑罰埃及，以及伊的神明及君王；我嘛欲刑罰法老及所有倚靠伊的人。 |
| 46:26 | 我欲將𪜶交佇愛欲刣𪜶的人的手，就是巴比倫王尼布甲尼撒及伊的人臣的手。毋拘，埃及將來會閣有人徛起，及早前仝款。」上主按呢宣布。 |
| 46:27 | 上主欲解救伊的子民 「我的僕人雅各，毋免驚！ 以色列，毋免失志！ 我欲對真遠的所在解救你， 對你受掠的地解救你的後代； 雅各的後代會倒來家己的鄉土安居樂業， 無人會閣互𪜶驚惶。 |
| 46:28 | 我的僕人雅各毋免驚，
因為我及你同在。 我趕你去許個國家，我欲給𪜶完全毀滅。 你咧，我𣍐給你完全消滅， 毋拘𣍐當無刑罰你； 我欲照公義管教你。」 上主按呢宣布。 |