| 章節 | 現代台語漢字2021版經文 |
| 43:1 | 耶利米受押去埃及 耶利米對人民傳達上主 — 𪜶的上帝差派伊講一切的話，講煞， |
| 43:2 | 何沙雅的子亞撒利雅、加利亞的子約哈難，及所有驕傲的人就對耶利米講：「你講白賊！上主 — 咱的上帝無差派你講『恁𣍐用得去埃及，寄居佇遐』， |
| 43:3 | 是尼利亞的子巴錄使弄你反對阮，欲將阮交互巴比倫的軍隊，互𪜶給阮刣死，抑是給阮掠去巴比倫。」 |
| 43:4 | 加利亞的子約哈難、所有的軍官，以及全體民眾，毋聽上主的話，無欲住佇猶大地。 |
| 43:5 | 加利亞的子約哈難及所有的軍官顛倒將猶大所有賰落來的人，就是對逐國倒轉來住佇猶大地許個人， |
| 43:6 | 包括查甫人、查某人、囝仔、王的查某子，及侍衛長尼布撒拉旦交代互沙番的孫，亞希甘的子基大利管理的人，以及先知耶利米及尼利亞的子巴錄， |
| 43:7 | 攏做夥導去埃及到答比匿。約哈難及伊的部下無聽趁上主的話。 |
| 43:8 | 佇答比匿，上主對耶利米講： |
| 43:9 | 「你著佇猶大人的面前提幾粒大粒石頭，佇答比匿的法老王宮門口的鋪石路，用灰土給𪜶埋起來； |
| 43:10 | 然後給𪜶講：『上主 — 萬軍的統帥、以色列的上帝按呢講：我欲派人去給我的僕人巴比倫王尼布甲尼撒導來，將伊的王位安佇許個石頭頂面；伊欲佇彼頂面搭伊奢颺的布棚。 |
| 43:11 | 伊欲來攻打埃及地：
註定死的，會死； 註定受掠的，會受掠； 註定死佇刀下的，會互人刣死。 |
| 43:12 | 我欲燒埃及的神廟。巴比倫王欲給埃及逐項搶了了，親像牧者啲給外袍的蝨母拌清氣，閣給許個神像攏提提去，然後無受阻擋離開埃及。 |
| 43:13 | 伊一定會摃碎埃及太陽神廟的柱像，放火燒埃及的神廟。』」 |