| 章節 | 現代台語漢字2021版經文 |
| 17:1 | 石磐出水 ( 民 20:1-13 ) 以色列人全體會眾順趁上主的命令，對汛的曠野一站一站向前行。𪜶佇利非訂紮營，佇遐無水通飲。 |
| 17:2 | 人民給摩西吵：「互阮水飲！」 摩西給𪜶講：「恁是按怎啲給我吵，是按怎啲試探上主？」 |
| 17:3 | 人民佇遐真嘴焦，愛欲飲水，就埋怨摩西，講：「你是按怎導阮對埃及出來，是欲互阮及阮的子兒、牲生攏嘴焦死是無？」 |
| 17:4 | 摩西就求叫上主講：「我欲按怎對待諸個人民？𪜶差不多欲用石頭給我抌死啦。」 |
| 17:5 | 上主給摩西講：「你導以色列幾個長老，行去人民的頭前；你的手著攑進前拍尼羅河的柺仔。 |
| 17:6 | 你去，我欲佇何烈的石磐遐徛佇你的面前。你拍彼個石磐，水會對遐流出來，互人民飲。」摩西就佇以色列長老的面前按呢做。 |
| 17:7 | 伊給彼個所在叫做瑪撒，嘛叫做米利巴；因為以色列人給伊吵，閣試探上主，講：「上主豈有佇阮中間？」 |
| 17:8 | 及亞瑪力人交戰 亞瑪力人來利非訂攻擊以色列人。 |
| 17:9 | 摩西給約書亞講：「你著選人去及亞瑪力人交戰。明仔載我欲攑上帝的柺仔，徛佇山頂。」 |
| 17:10 | 約書亞就照摩西的命令去及亞瑪力人交戰；摩西、亞倫，及戶珥攏𬦰上山頂。 |
| 17:11 | 摩西手攑起來的時，以色列人就刣贏；手垂落去的時，亞瑪力人就刣贏。 |
| 17:12 | 毋拘摩西手痠，亞倫及戶珥就徙石頭來下佇伊的下面，互伊坐啲；𪜶扶伊的手，一個佇正旁，一個佇倒旁；伊的手就無垂落來，一直到日落。 |
| 17:13 | 約書亞用刀刣贏亞瑪力人。 |
| 17:14 | 上主給摩西講：「我欲將亞瑪力的名對天下完全擦消。你著將此個事記錄佇冊裡通提醒後代，閣讀互約書亞聽。」 |
| 17:15 | 摩西起一座祭壇，給伊號名叫做「上主尼西」； |
| 17:16 | 閣講：「著攑上主的軍旗！上主欲代代及亞瑪力人交戰。」 |