| 章節 | 現代台語漢字2021版經文 |
| 42:1 | 人民請耶利米替𪜶祈禱 所有的軍官，包括加利亞的子約哈難、何沙雅的子耶撒尼亞，以及所有的人民，無論尊貴抑是卑微，攏去見先知耶利米， |
| 42:2 | 對伊講：「請接受阮的請求，替阮諸個賰落來的人向上主 — 你的上帝祈禱。你有看著，阮本來人真多，毋拘現在賰即少。 |
| 42:3 | 請替阮祈求上主 — 你的上帝，指示阮應該行的路，著按怎做。」 |
| 42:4 | 先知耶利米給𪜶講：「按呢我知。好！我會照恁的請求，向上主 — 恁的上帝祈禱。上主給我講什麼，我一定會給恁講，𣍐給恁隱瞞。」 |
| 42:5 | 𪜶就對耶利米講：「阮若無照上主 — 你的上帝派你來傳達互阮的逐句話去做，願伊佇咱中間做公正可靠的見證人。 |
| 42:6 | 是阮請你替阮向上主懇求，所以，伊對阮講的話無論是好抑是僫，阮攏欲聽趁上主 — 阮的上帝，按呢阮才會事事順利。」 |
| 42:7 | 上主應答耶利米的祈禱 十日後，上主對耶利米講話。 |
| 42:8 | 耶利米就叫加利亞的子約哈難，以及及伊做夥的軍官、人民，無論尊貴抑是卑微，攏去伊遐。 |
| 42:9 | 伊給𪜶講：「恁有請我為著恁向上主 — 以色列的上帝祈禱，伊按呢講： |
| 42:10 | 『恁若猶原住佇此塊土地，我就欲給恁重建，𣍐給恁拆毀；欲給恁栽種，𣍐給恁拔出；因為我為著我降互恁的災禍感覺真傷心。 |
| 42:11 | 恁啲驚的巴比倫王，毋免驚伊！因為我及恁同在，欲解救恁，互恁得著自由。上主按呢宣布。 |
| 42:12 | 我欲對恁施憐憫，嘛欲互巴比倫王憐憫恁，互恁倒轉來恁的土地。』 |
| 42:13 | 「毋拘恁若無欲留𫢶遮，無欲順從上主 — 恁的上帝的話，顛倒講： |
| 42:14 | 『毋，阮欲去埃及；遐無戰爭，𣍐聽著哨角的聲，閣有物件通食𣍐枵死。阮欲去住遐。』 |
| 42:15 | 今，猶大賰落來的人啊，著聽上主的話！上主 — 萬軍的統帥、以色列的上帝按呢講：『恁若堅持欲去埃及，欲寄居佇遐， |
| 42:16 | 恁啲驚的刀劍會趇到遐；恁啲驚的飢荒嘛會隨恁到埃及，互恁死佇遐。 |
| 42:17 | 所有堅決欲寄居佇埃及的人一定會因為戰亂、飢荒、瘟疫死佇遐，無一個會當活落來，脫離我欲降互𪜶的災禍。』 |
| 42:18 | 「上主 — 萬軍的統帥、以色列的上帝按呢講：『恁若去埃及，我就欲對恁發大受氣，親像以前對耶路撒冷的住民發大受氣仝款。恁會成做人厭惡、咒詛、侮辱的對象，互人著驚；恁嘛𣍐當閣看著恁的故鄉。』 |
| 42:19 | 「對恁諸個猶大賰落來的人，上主講：『毋通去埃及！』恁著清楚知影，我今仔日已經給恁警告。 |
| 42:20 | 恁已經犯致命的錯誤；恁請我去求問上主 — 恁的上帝，恁講：『請替阮向上主 — 咱的上帝祈禱，將上主 — 咱的上帝對你講的話攏給阮講，阮一定欲聽趁。』 |
| 42:21 | 今我將上主的話給恁講啦，恁煞毋聽趁上主 — 恁的上帝派我來給恁講的逐句話。 |
| 42:22 | 所以，恁著確實知，恁會佇欲去寄居的地因為抵著戰亂、飢荒、瘟疫滅亡。」 |