| 章節 | 現代台語漢字2021版經文 |
| 41:1 | 七月，猶大王王家的後代，嘛是官員，以利沙瑪的孫，尼探雅的子以實瑪利導十個人來米斯巴見亞希甘的子基大利。𪜶佇米斯巴做夥食飯的時， |
| 41:2 | 尼探雅的子以實瑪利及彼十個及伊做夥來的人，用刀刣死巴比倫王指派做省長，沙番的孫，亞希甘的子基大利。 |
| 41:3 | 以實瑪利嘛刣死佇米斯巴所有及基大利做夥的猶大人，以及駐在佇遐的巴比倫軍兵。 |
| 41:4 | 隔日，人猶毋知基大利受暗殺的事， |
| 41:5 | 有八十個人對示劍、示羅、撒馬利亞來到米斯巴。𪜶剃嘴鬚，拆破衫，割傷家己的身軀，帶素祭及乳香欲去上主的聖殿獻祭。 |
| 41:6 | 尼探雅的子以實瑪利對米斯巴出來，那行那哮去迎接𪜶。以實瑪利抵著𪜶，就對𪜶講：「請來見亞希甘的子基大利。」 |
| 41:7 | 𪜶一下入城，尼探雅的子以實瑪利及伊的部下就刣死許個人，給𪜶的屍體㧒佇焦去的蓄水池。 |
| 41:8 | 彼八十個人中間有十個對以實瑪利講：「毋通給阮刣死。阮有藏大麥、小麥、油，及蜜佇園裡。」伊就停手，無將此十個人及其他的同伴做夥刣死。 |
| 41:9 | 尼探雅的子以實瑪利將許個因為基大利的緣故互伊刣死的人的身屍，攏㧒落去蓄水池㧒甲淀淀淀；此個蓄水池是以前猶大王亞撒為著防衛北國以色列王巴沙挖的。 |
| 41:10 | 以實瑪利將米斯巴賰落來的人民，包括西底家王的查某子，及猶住佇米斯巴的人攏掠起來。諸個賰落來的人是侍衛長尼布撒拉旦交代亞希甘的子基大利管理的。尼探雅的子以實瑪利欲將諸個人攏掠去亞捫人遐。 |
| 41:11 | 加利亞的子約哈難及跟隨伊的軍官聽著尼探雅的子以實瑪利所做的歹代誌， |
| 41:12 | 就導所有的部下欲去及尼探雅的子以實瑪利交戰，佇基遍的大水池邊趇著伊。 |
| 41:13 | 互以實瑪利掠去許個人民看著加利亞的子約哈難以及及伊做夥來的軍官，攏真歡喜。 |
| 41:14 | 按呢，許個互以實瑪利對米斯巴掠去的人就越轉身走過來加利亞的子約哈難遐。 |
| 41:15 | 尼探雅的子以實瑪利及另外八個人脫離約哈難的手，走去亞捫人遐。 |
| 41:16 | 尼探雅的子以實瑪利刣死亞希甘的子基大利了後，將賰落來的人民，包括查甫人、兵仔、婦女、囝仔、官員，對米斯巴掠去基遍；後來，加利亞的子約哈難及跟隨伊的軍官將許個人攏救出來。 |
| 41:17 | 𪜶去到伯利恆附近的基羅特‧金罕，佇遐歇睏，準備欲落去埃及， |
| 41:18 | 通逃避巴比倫人。尼探雅的子以實瑪利暗殺巴比倫王所指派做省長，亞希甘的子基大利了後，𪜶真驚巴比倫人。 |