| 章節 | 現代台語漢字2021版經文 |
| 30:1 | 上主給子民應允 上主 — 以色列的上帝對耶利米按呢講：「所有我對你講的話，你攏著寫佇冊卷。 |
| 30:2 | 併於上節 |
| 30:3 | 上主講：時日啲欲到，我欲互我受掠的子民以色列及猶大倒轉來。我欲互𪜶倒來我賞賜𪜶祖先的土地，𪜶就得著此塊土地做產業。上主按呢宣布。」 |
| 30:4 | 以下是上主針對以色列及猶大講的話。 |
| 30:5 | 上主按呢講：
恁有聽著恐怖的喝聲； 只有驚惶，無平安。 |
| 30:6 | 恁家己去問看覓，調查看覓，
查甫人豈會生子？ 是按怎我看著逐個查甫人雙手撐腰， 親像啲欲生產的查某人， 面攏青筍筍？ |
| 30:7 | 慘啊！彼日是恐怖的日子，
前到今毋曾有的日子， 是我的子民抵著災難的日子， 毋拘𪜶會得著解救，脫離災難。 |
| 30:8 | 上主 — 萬軍的統帥按呢宣布：「到彼日，我欲摃斷我子民頷頸的軛，擦斷縛𪜶的索；𪜶𣍐閣做外族人的奴隸。 |
| 30:9 | 𪜶欲侍奉上主 — 𪜶的上帝，嘛欲服事我為著𪜶興起作王的大闢的子孫。
|
| 30:10 | 我的僕人雅各，毋免驚！
以色列，毋免失志！ 我欲對真遠的所在解救你， 對你受掠的地解救你的後代； 雅各的後代會倒來家己的鄉土安居樂業， 無人會閣互𪜶驚惶。 上主按呢宣布。 |
| 30:11 | 我及你同在，欲解救你，
嘛欲完全毀滅我趕你去許個國家。 我𣍐給你完全消滅， 毋拘𣍐當無刑罰你； 我欲照公義管教你。」 上主按呢宣布。 |
| 30:12 | 上主對錫安的人民講：
你受的傷𣍐醫得， 你的孔嘴真傷重。 |
| 30:13 | 你受傷害，無人替你辯護；
嘛無藥通給你醫治。 |
| 30:14 | 你的愛人攏𣍐記得你，
𣍐閣來追求你。 因為你的罪真重，罪惡真多， 我打擊你親像對敵啲拍你， 殘忍刑罰你。 |
| 30:15 | 你是按怎因為你受的傷害喝咻，
講，你的痛苦𣍐醫得？ 因為你的罪真重，罪惡真多， 我才按呢對待你。 |
| 30:16 | 今，所有吞滅你的，欲受吞滅，
你的對敵一個一個攏欲受掠； 掠你的，欲互人掠去， 搶你的，欲成做獵物。 |
| 30:17 | 雖然人攏講，錫安是受放拺的，
無人欲插伊； 毋拘，我欲醫治你的傷， 互你的孔嘴生肉過皮。 上主按呢宣布。 |
| 30:18 | 上主按呢講：
看咧，我欲互雅各的子孫倒轉來， 欲憐憫𪜶受毀壞的家園； 城會佇原來的土堆頂面重建， 宮殿閣起佇原來的所在。 |
| 30:19 | 許個住民欲發出感謝歡喜的聲；
我欲互𪜶的人口加添，𣍐減少， 互𪜶有尊榮，𣍐閣受看輕。 |
| 30:20 | 𪜶的子孫欲親像早前赫呢強盛；
𪜶的國家會受我看顧得著堅立； 所有壓迫𪜶的，我欲給𪜶刑罰。 |
| 30:21 | 治理𪜶的是𪜶家己的人，
𪜶的統治者是𪜶的同胞。 我欲互伊親近我， 伊嘛會來親近我； 若毋是按呢，啥人敢來到我面前？ 上主按呢宣布。 |
| 30:22 | 恁欲做我的子民，
我欲做恁的上帝。 |
| 30:23 | 看咧，上主的受氣親像暴風發出，是毀滅的捲螺仔風，欲搧歹人的頭殼。 |
| 30:24 | 上主的受氣𣍐消，直到伊的計劃完成；佇將來的日子，恁就會明白。 |