| 章節 | 現代台語漢字2021版經文 |
| 27:1 | 耶利米擔牛軛 約西亞的子西底家開始作王統治猶大國的時，上主的話臨到耶利米。 |
| 27:2 | 上主對我講：「你著用索及柴楗做軛，下佇你的頷頸， |
| 27:3 | 然後將下面的信息委託來耶路撒冷見猶大王西底家許個外國使者，傳達互以東王、摩押王、亞捫王、泰爾王、西頓王； |
| 27:4 | 請𪜶給𪜶的王講：『上主 — 萬軍的統帥、以色列的上帝按呢講：恁著對恁的主人講： |
| 27:5 | 我用大權能，用大氣力創造大地以及地上的人及動物；我看什麼人較適合就將大地交互伊。 |
| 27:6 | 現在我將諸個國交互我的僕人巴比倫王尼布甲尼撒，嘛將野外的動物交互伊管理。 |
| 27:7 | 列國攏欲服事伊、伊的子，及伊的孫，直到伊的國家衰敗；彼時，換伊著服事諸個國及君王。 |
| 27:8 | 「『若有叨一族、叨一國毋肯服事巴比倫王尼布甲尼撒，頷頸毋肯擔伊的軛，我一定欲用戰亂、飢荒、瘟疫刑罰許個國家，直到我通過巴比倫王的手給𪜶消滅。上主按呢宣告。』 |
| 27:9 | 毋拘恁猶大人民毋通聽恁的先知、卜卦的、解夢的、看天象的、行邪術的的話；𪜶給恁講：『恁一定𣍐服事巴比倫王。』 |
| 27:10 | 其實𪜶講的預言是假的，顛倒會互恁流亡去真遠的所在；我欲給恁趕出去，互恁滅亡。 |
| 27:11 | 若有叨一國肯擔巴比倫王的軛，服事伊，我一定欲互彼個族留佇伊本國種作，徛起。上主按呢宣告。」 |
| 27:12 | 我嘛將諸個話攏對猶大王西底家講：「恁的頷頸著擔巴比倫王互恁的軛，服事伊及伊的人民，才會當生存。 |
| 27:13 | 你及你的人民哪著因為戰亂、飢荒、瘟疫滅亡，親像上主對許個毋肯服事巴比倫王的國家所講的按呢。 |
| 27:14 | 毋通聽許個先知對恁講的話，𪜶講『恁𣍐服事巴比倫王』，其實𪜶的預言攏是白賊。 |
| 27:15 | 上主講：『我無差派𪜶，𪜶竟然利用我的名講假預言。恁若聽𪜶的話，我就欲將恁及許個給恁講假預言的先知趕出去，互恁做夥滅亡。』」 |
| 27:16 | 我閣對祭司及諸個人民講：「上主按呢講：『恁毋通聽許個先知給恁講的話，𪜶講：看咧，上主聖殿的器具無偌久攏會對巴比倫搬倒來。其實𪜶講的是白賊話。 |
| 27:17 | 毋通信𪜶的話。著服事巴比倫王，按呢才會當生存。哪著互此個城變做荒埔？ |
| 27:18 | 𪜶若是真的先知，真正有上主的話傳互𪜶，𪜶應該著祈求上主 — 萬軍的統帥，互聖殿、猶大王宮，及耶路撒冷內面賰落來的器具，𣍐互人搶去巴比倫。』」 |
| 27:19 | 上主 — 萬軍的統帥講著關係銅柱、銅海、盆座，以及猶留佇此個城的器具； |
| 27:20 | 就是巴比倫王尼布甲尼撒掠約雅敬的子猶大王約雅斤，以及猶大及耶路撒冷的官員的時，無搬去巴比倫的器具； |
| 27:21 | 關係聖殿及猶大王宮內面，以及耶路撒冷賰落來的器具，上主 — 萬軍的統帥、以色列的上帝按呢講： |
| 27:22 | 「諸個器具一定會互人搬去巴比倫，囥佇遐，直到我閣再眷顧𪜶彼日。我上主按呢宣布。到彼時，我一定會將諸個器具帶轉來此塊土地。」 |