| 章節 | 現代台語漢字2021版經文 |
| 23:1 | 將來的向望 上主講：「許個殺害閣趕散我草場的羊的牧者有災禍啦！ |
| 23:2 | 關係諸個著牧養上主子民的牧者，上主 — 以色列的上帝按呢講：『恁無照顧我的羊，閣給𪜶趕散，恁著知，我欲因為恁的歹行為給恁處罰。 |
| 23:3 | 我欲聚集許個賰落來的羊，對我趕散𪜶去的所在給𪜶導倒來，互𪜶生湠閣加添真多。 |
| 23:4 | 我欲派新的牧者牧養𪜶。我的羊群𣍐閣失膽驚惶，連一隻都𣍐失落。』上主按呢宣布。」 |
| 23:5 | 上主講：「時日啲欲到，我欲互大闢的世系發一枝公義的枝。伊治國賢明，佇此個土地施行公平及正義。 |
| 23:6 | 因為伊的執政，猶大欲得著解救，以色列人民會當安居樂業。人會給伊叫做『上主是阮的公義』。」 |
| 23:7 | 上主講：「時日一下到，人咒誓的時𣍐閣講：『我指彼位導以色列人出埃及永活的上主咒誓。』 |
| 23:8 | 𪜶欲講：『我指彼位導以色列人離開北方的地，離開伊給𪜶流放去的逐國彼位永活的上主咒誓。』𪜶會徛起佇家己的鄉土。」 |
| 23:9 | 警告假先知 講著許個先知，我的心刺鑿， 我歸身軀的骨頭硞硞趒； 為著上主及伊神聖的話， 我親像酒醉的人， 𣍐當控制家己。 |
| 23:10 | 此個地四界攏是對上主不忠的人；
𪜶的所做邪惡，濫用權力。 𪜶受咒詛，地就曠旱， 草場枯焦。 |
| 23:11 | 上主講：
先知及祭司攏褻瀆我， 佇我的聖殿做邪惡的事。 |
| 23:12 | 𪜶行的路暗閣滑，
互人追趇，佇遐跋倒。 我刑罰𪜶的日到啦； 我欲互災禍臨到𪜶。 |
| 23:13 | 我看見撒馬利亞的先知做可惡的事：
𪜶奉巴力神明的名講預言， 導我的人民以色列行錯誤的路。 |
| 23:14 | 我看見耶路撒冷的先知做可怕的事：
𪜶犯姦淫，講白賊， 加強歹人的勢力， 所以無人離開邪惡。 對我來看，𪜶攏親像所多瑪， 耶路撒冷的住民親像蛾摩拉。 |
| 23:15 | 所以，我上主 — 萬軍的統帥針對耶路撒冷的先知講：
我欲互𪜶食苦果，飲毒水， 因為逐所在無敬虔的風氣是𪜶造成的。 |
| 23:16 | 上主 — 萬軍的統帥對耶路撒冷人民講：「毋通聽諸個先知的話；𪜶傳互恁的是虛假的向望。𪜶講的預言是家己想的，毋是我傳互𪜶的。 |
| 23:17 | 𪜶一直對許個毋肯聽我的話的人講：『上主講：平安無事！』閣對許個心硬的人講：『災禍𣍐臨到恁。』 |
| 23:18 | 「豈有人參加上主天庭的議會，曾看著抑是聽著伊講話？𪜶豈有認真聽伊講的話？ |
| 23:19 | 看咧，上主的大受氣親像捲螺仔風，佇歹人的頭殼頂轉踅。 |
| 23:20 | 到上主的計劃完全實現，伊的受氣才會煞；時日一下到，恁才會清楚明白諸個事。 |
| 23:21 | 「我無差派諸個先知，毋拘𪜶家己四界走；我無對𪜶講話，毋拘𪜶家己講預言。 |
| 23:22 | 𪜶若曾參加我召集的議會，就會對我的人民傳達我的信息，互人民離開罪惡的路，無做邪惡的事。 |
| 23:23 | 「我上主問恁：『我豈干焦佇近的所在才是上帝，佇遠遠的所在就毋是上帝？』 |
| 23:24 | 我閣問恁：『豈有人會當匿佇隱密的所在互我看𣍐著？我豈毋是充滿佇天地逐角落？』 |
| 23:25 | 許個先知用我的名講假的預言，講：『我有夢見！我有夢見！』 |
| 23:26 | 𪜶心存詭詐，講白賊話欲到什麼時？ |
| 23:27 | 𪜶互相講家己的夢，欲互我的人民𣍐記得我的名，親像𪜶的祖先為著巴力𣍐記得我的名。 |
| 23:28 | 據在許個做夢的先知去講𪜶做的夢；互許個聽我信息的先知忠實傳達我的話。麥稿及麥穗欲按怎比？ |
| 23:29 | 我的信息豈毋是親像火，豈毋是親像會摃碎石磐的鐵鎚？ |
| 23:30 | 「我上主按呢講：『注意！我欲對付許個先知。𪜶互相偷用別人的話當做我的話。』 |
| 23:31 | 上主閣講：『注意！我欲對付許個先知。𪜶將家己的話當做我的話。』 |
| 23:32 | 我欲對付許個先知，因為𪜶的夢攏是騙人的；𪜶用諸個夢，以及白賊及誇口的話導我的人民行入歪路。我無差派𪜶，嘛無命令𪜶；𪜶對諸個人民攏無利益。上主按呢宣告。」 |
| 23:33 | 上主的信息 上主對我講：「我的子民、先知，抑是祭司若問你：『上主有什麼信息？』你著給𪜶講：『恁是上主的重擔；伊欲棄拺恁。』 |
| 23:34 | 若有先知、祭司，抑是我的子民講『這就是上主的信息』，我欲刑罰伊及伊的全家。 |
| 23:35 | 逐個人著問家己的厝邊、朋友：『上主有講什麼？上主有應答什麼？』 |
| 23:36 | 𪜶𣍐當閣講『這是上主的信息』。若有人閣講此句話，我就欲將我的信息變做伊的重擔。𪜶濫糝使用永活上帝的話，就是上主 — 萬軍的統帥咱的上帝的話。 |
| 23:37 | 你著問許個先知：『上主有講什麼？上主有應答什麼？』 |
| 23:38 | 𪜶若閣講『這是上主的信息』，此句話我已經吩咐恁毋通閣講；你著給𪜶講： |
| 23:39 | 『我一定欲將恁放𣍐記得，給恁以及我賜互恁及恁祖先的城對我面前㧒出去。 |
| 23:40 | 我欲互恁久長見笑，永遠𣍐𣍐記得此個侮辱。』」 |