| 章節 | 現代台語漢字2021版經文 |
| 21:1 | 預言耶路撒冷滅亡 上主的話臨到耶利米。彼時，猶大王西底家差派瑪基雅的子巴施戶珥，及瑪西雅的子祭司西番雅去耶利米遐。𪜶要求，講： |
| 21:2 | 「巴比倫王尼布甲尼撒派軍隊來攻打此個城，請替阮懇求上主，無定著上主會用奇妙的方法互尼布甲尼撒撤退。」 |
| 21:3 | 耶利米就對𪜶講：「恁去給西底家講： |
| 21:4 | 『上主 — 以色列的上帝按呢講：西底家，你許個出去城外抵抗巴比倫王及伊的軍隊的，我欲將𪜶手裡攑的武器攏收倒來囥佇城內。 |
| 21:5 | 我欲佇大受氣中用所有的氣力攻擊恁。 |
| 21:6 | 我欲攻擊城內所有的人民及動物，𪜶會因為瘟疫死。 |
| 21:7 | 你及你的官員，以及經過戰亂、瘟疫、飢荒賰落來的人，我欲將𪜶交互巴比倫王尼布甲尼撒，就是欲害恁性命的對敵。巴比倫王𣍐憐憫恁，𣍐同情恁，會用刀劍刣死恁，𣍐手下留情。上主按呢宣告。』」 |
| 21:8 | 上主閣吩咐耶利米對人民講：「上主按呢講：『我給活路及死路排佇恁的面前，恁家己選擇。 |
| 21:9 | 留佇城內的人，若毋是互人刣死，就是餓死抑是病死；毋拘恁若出城去給巴比倫人投降，就會活。 |
| 21:10 | 我已經決定無欲賜福氣，欲降災禍佇此個城。此個城欲交佇巴比倫王的手；伊會放火燒此個城。』上主按呢宣告。」 |
| 21:11 | 審判猶大王室 上主吩咐耶利米給大闢的後代 — 猶大王室講：「恁著注意聽我上主講的話。恁逐日著秉公行義，對欺壓的人的手解救受壓制的人，才免恁邪惡的行為惹我受氣，親像火啲𤏸無人拍會化。 |
| 21:12 | 併於上節 |
| 21:13 | 耶路撒冷，我欲攻擊你；你坐佇高高的山頂，親像大石𫞼佇平原。你誇口無人會當攻擊你，會當攻入你逃閃的所在。 |
| 21:14 | 毋拘，我欲因為你的行為給你處罰。我欲放火燒耶路撒冷的宮殿；大火會吞滅城四周圍所有的一切。上主按呢宣告。」 |