| 章節 | 現代台語漢字2021版經文 |
| 20:1 | 耶利米及祭司巴施戶珥衝突 上主聖殿的總管，音麥的子祭司巴施戶珥聽著先知耶利米講的話， |
| 20:2 | 就拍伊，閣用柴楗給伊銬佇聖殿北旁的便雅憫門。 |
| 20:3 | 第二日，巴施戶珥才將先知耶利米放開。耶利米對伊講：「上主無欲閣叫你做巴施戶珥，欲給你叫做瑪歌珥‧米撒畢。 |
| 20:4 | 上主講：『我欲互你及你的朋友攏著驚；你欲親目看著𪜶互對敵刣死。我欲將猶大人交佇巴比倫王的手；伊欲給𪜶掠去巴比倫，抑是用刀給𪜶刣死。 |
| 20:5 | 我嘛欲將此個城所有的財物，就是恁勞苦得著的及寶貴的物件，以及猶大列王的寶貝，攏交互對敵；𪜶欲將所有的一切攏搶去，帶去巴比倫。 |
| 20:6 | 巴施戶珥，你及你家內所有的人攏會受掠去巴比倫；你及所有聽你講假預言的朋友，攏會死佇遐，埋佇遐。』」 |
| 20:7 | 耶利米怨嘆上主 上主啊，你騙我，我互你諞去。 你比我較強，贏過我。 我逐日成做人恥笑的對象； 𪜶攏戲弄我。 |
| 20:8 | 我逐遍講話攏真大聲；
我喝講：「有強暴及毀滅！」 上主的話害我逐日互人詈罵，恥笑。 |
| 20:9 | 我若講「我無欲閣提起上主，
無欲閣奉伊的名講話」， 我的內面就親像有火啲𤏸，鑽入我的骨頭； 我擋𣍐牢，無法度無講。 |
| 20:10 | 我閣聽見真多人細聲講：
「彼個講『逐所在會有驚惶』的人來啦， 咱來告伊，來給伊控告。」 我的朋友等欲看我犯錯， 𪜶講：等伊互人諞去，咱就會當掠著機會給伊報復。 |
| 20:11 | 總是，上主及我同在；
伊親像強猛可怕的勇士。 許個壓迫我的人攏會跋倒失敗， 會見笑漏氣； 人永遠𣍐𣍐記得𪜶的見笑。 |
| 20:12 | 上主 — 萬軍的統帥啊，
你監察人的心思念頭， 照公義審判。 我將我的案件交互你， 求你互我看著你主持公道。 |
| 20:13 | 著向上主唱歌！
著稱讚上主！ 因為伊解救受壓迫的人 脫離邪惡的人的手。 |
| 20:14 | 願我出世彼日受咒詛；
願我的老母生我彼日無受祝福。 |
| 20:15 | 願彼個給我的老父報消息的人受咒詛！
伊講「你得著一個查甫嬰」，互我的老父聽了真歡喜。 |
| 20:16 | 願彼個人親像互上主毀滅，無得著憐憫的城。
願伊早起時聽著哀哭的聲， 中晝時聽著戰爭警報的聲。 |
| 20:17 | 因為伊無佇我出世以前給我刣死，
無互我的老母的腹肚成做我的墳墓。 |
| 20:18 | 我是按怎著出世？
我的經歷攏是勞苦及憂傷。 我著佇受侮辱的中間結束我的人生是無？ |