| 章節 | 現代台語漢字2021版經文 |
| 12:1 | 耶利米質問上主 上主，我及你爭辯的時， 逐遍攏你贏， 毋拘我猶是欲及你理論關係公義的代誌； 是按怎歹人攏事事順利？ 作人奸鬼的哪會享受榮華？ |
| 12:2 | 你給𪜶栽種，𪜶就釘根，
大欉，結實。 𪜶常常講起你， 毋拘心內無你。 |
| 12:3 | 上主啊，你識我，了解我，
試驗我對你的忠誠。 求你給許個歹人拖出來， 親像啲扭欲刣的羊； 給𪜶關起來， 關到欲刣彼日。 |
| 12:4 | 此個地曠旱，
田野的青草全部焦去欲到底時？ 因為此個地的住民做歹， 鳥仔及牲生死了了； 毋拘𪜶講：「上主無啲管咱的結局！」 |
| 12:5 | 上主講：
你及人行路比賽都會悿， 哪走會贏戰馬？ 你佇安全曠闊的所在才會感覺安穩， 若佇約旦河邊的樹林，你欲按怎？ |
| 12:6 | 連你的兄弟、你的親成都會出賣你，
佇你的後面大聲攻擊你； 𪜶就是對你講好聽話， 你嘛毋通信任𪜶。 |
| 12:7 | 上主為伊的子民憂傷 我放拺以色列家， 放棄我的產業； 將我心愛的子民交佇伊的對敵的手頭。 |
| 12:8 | 我的子民對我來講，親像樹林內的獅，
大聲攻擊我， 所以我怨恨𪜶。 |
| 12:9 | 我的子民對我來講，親像有斑點的鷹，
真多隻鷹佇周圍攻擊伊。 著招集田野的野獸做夥來吞食伊。 |
| 12:10 | 列國的統治者毀滅我栽培的子民，
踐踏我的田園， 互我肥媠的田園變做拋荒的荒埔。 |
| 12:11 | 𪜶破壞土地，
互土地拋荒甲對我哀哭； 全地拋荒，毋拘無人關心。 |
| 12:12 | 毀滅者來到曠野光滑的山崙仔；
上主的刀欲毀滅大地，對此旁到彼旁； 無一個人安全。 |
| 12:13 | 𪜶種麥仔，收成莿；
𪜶勞苦種作，毋拘無收成； 𪜶的收成互𪜶大大失望， 因為我上主對𪜶發大受氣。 |
| 12:14 | 上主警告以色列周圍列國 上主按呢講：「我欲將所有的歹厝邊，對𪜶的土地拔出來；𪜶侵犯我賜互我的子民以色列的土地；我嘛欲將猶大人民對𪜶中間拔出來。 |
| 12:15 | 我給猶大人民拔出來了後，欲斡轉來憐憫𪜶，給𪜶導倒來，互𪜶逐個人轉去家己的故鄉，回復𪜶逐個人的產業。 |
| 12:16 | 後來，周圍的國家若肯誠心學習我子民的信仰，指我 — 永活的上主的名咒誓，親像𪜶以前教我的子民指巴力咒誓仝款，𪜶就會佇我子民的中間得著復興。 |
| 12:17 | 「毋拘若有國家毋聽趁，我就欲給伊拔起來，將伊消滅。」上主按呢宣告。 |