| 章節 | 現代台語漢字2021版經文 |
| 10:1 | 拜偶像及真實的敬拜 以色列人，著聽上主對恁講的話。 |
| 10:2 | 上主按呢講：
恁毋通學外族人的宗教行為； 雖然列國會因為奇怪的天象驚惶， 毋拘恁攏毋免驚。 |
| 10:3 | 萬民所拜的攏是虛無，
不過是對樹林用斧頭剉落來的柴箍； 師傅雕刻， |
| 10:4 | 用金銀妝飾，
用摃槌釘釘仔， 給伊𫞼牢啲， 互伊𣍐振動。 |
| 10:5 | 𪜶的神像親像刺瓜仔園的稻草人，
𣍐講話，𣍐行路， 著互人扛。 毋免驚𪜶！ 𪜶𣍐降災禍，嘛𣍐賜福氣。 |
| 10:6 | 上主啊，無人會當及你比；
只有你是偉大，你有大權能。 |
| 10:7 | 萬國的王，啥人敢毋敬畏你？
只有你應該受敬畏。 列國所有智慧的人 及一切有權力的人， 無人會當及你比。 |
| 10:8 | 𪜶攏愚戇無知；
許個偶像𣍐當互𪜶什麼教示； 𪜶不過是柴頭若定。 |
| 10:9 | 拍做歸片的銀對他施運來，
金對烏法進口， 攏是師傅及銀匠的作品； 𪜶所穿藍色、紫色的衫， 嘛是技術巧妙的師傅做的。 |
| 10:10 | 只有上主是真神，
是活的上帝，是永遠存在的君王。 伊一下受氣，大地搖動； 伊發大受氣，列國攏擋𣍐牢。 |
| 10:11 | 恁著給𪜶講：「許個毋是創造天地的神明，攏欲對天下地上消失。」 |
| 10:12 | 稱讚上主 上主用家己的大能創造大地， 用伊的智慧堅立世界， 用聰明搋開穹蒼。 |
| 10:13 | 上主一下出聲，天頂的水就絞滾，
雲霧就對天邊海角淐出來； 伊對雨的中間射出熠爁， 對伊的倉庫送風出來。 |
| 10:14 | 世間人攏愚戇無知；
逐個拍金師傅攏為著家己造的神像見笑， 因為𪜶鑄的神像攏是虛假，內面無性命。 |
| 10:15 | 偶像攏是虛假，
是人恥笑的對象； 刑罰一下到，𪜶攏會消失。 |
| 10:16 | 作雅各產業的上帝及𪜶無仝款；
伊是創造萬有的主； 以色列是伊的子民，是伊的產業。 伊的稱呼是上主 — 萬軍的統帥。 |
| 10:17 | 預告流亡 恁住佇受圍困的城的人，著收拾恁的行李離開。 |
| 10:18 | 因為上主講：「此遍我欲將此所在的住民擲㧒确；給𪜶折磨，互𪜶覺醒。」
|
| 10:19 | 耶路撒冷人大聲喝，講：
阮慘啊，阮著傷啦！ 阮受的傷真重。 毋拘阮想， 這是阮著忍受的痛苦。 |
| 10:20 | 阮的布棚毀壞啦，
布棚的索仔斷去啦， 阮的囝仔攏離開阮，𣍐閣倒來； 𣍐閣有人來給阮搭布棚， 給阮掛布簾。 |
| 10:21 | 我應講：
領導者攏愚戇無知，無欲尋求上主， 所以攏𣍐順利； 𪜶的羊群嘛攏受趕散。 |
| 10:22 | 聽咧，有消息傳來！
有大擾動對北方來， 欲互猶大的城鎮變做荒埔， 變做豺狼的巢。 |
| 10:23 | 上主，我知，人𣍐當決定家己的路，
𣍐當控制家己的腳步。 |
| 10:24 | 上主啊，你管教我的時，
求你公道對待我， 毋通佇你大受氣中互我一無所有。 |
| 10:25 | 求你將大受氣摒佇無敬畏你的國家，
以及無欲求叫你的名的民族； 𪜶吞食雅各， 給伊完全消滅， 互伊徛起的所在拋荒。 |