| 章節 | 現代台語漢字2021版經文 |
| 9:1 | 苦𣍐得我的頭變做水源，
我的目睭變做目屎的泉源， 暝日為著互人刣死的同胞哀哭。 |
| 9:2 | 足希望佇曠野有客棧通住，
互我通放拺我的同胞，離開𪜶遠遠； 因為𪜶是一群行淫背叛的歹人。 |
| 9:3 | 𪜶的舌捲起來親像弓，
為著欲講白賊； 𪜶佇國內有權勢， 毋是靠真實，是靠詭詐。 上主講： 我的子民惡上加惡， 𪜶毋識我。 |
| 9:4 | 恁逐個人著持防恁的厝邊，
連親兄弟都毋通信任； 兄弟仔攏啲講白賊， 厝邊嘛啲造謠誹謗。 |
| 9:5 | 𪜶互相欺騙，
無欲講真實； 𪜶訓練嘴舌講白賊， 拍拼做歹。 |
| 9:6 | 𪜶慣勢講白賊，
毋承認我是𪜶的上帝。 上主按呢講。 |
| 9:7 | 上主 — 萬軍的統帥講：
我欲鍛鍊我的子民，給𪜶磨練； 若無按呢，我欲按怎處理𪜶？ |
| 9:8 | 𪜶的舌親像毒箭，講話詭詐；
逐個人對厝邊講好聽話， 毋拘心內欲謀害𪜶。 |
| 9:9 | 𪜶做諸個事，我豈毋免辦𪜶？
親像此款民族，我豈毋免給𪜶報復？ 上主按呢宣告。 |
| 9:10 | 我欲為著山嶺啼哭悲傷，
為著曠野的草埔唱哀歌； 𪜶攏互火燒了了， 無人行對遐去。 牛羊的聲無閣聽著； 飛鳥及野獸的影無閣看著。 |
| 9:11 | 我欲互耶路撒冷拋荒，
成做豺狼的巢； 欲互猶大的城鎮變做荒埔， 無閣有人住。 |
| 9:12 | 啥人有夠聰明，通了解此個事？上主通指示啥人，互伊解說：此個地是按怎毀壞，拋荒親像曠野，無人對遐經過？ |
| 9:13 | 上主講：這是因為𪜶放拺我賜互𪜶的律法，無聽趁我的話，毋實行我的律法； |
| 9:14 | 𪜶固執照家己的意思作事，照𪜶的祖先教𪜶的去拜巴力。 |
| 9:15 | 所以，上主 — 萬軍的統帥、以色列的上帝宣布：我欲互𪜶食苦果，飲毒水。 |
| 9:16 | 我欲給𪜶流放去𪜶及𪜶的祖先毋識的列國，互𪜶受追殺到完全消滅。 |
| 9:17 | 耶路撒冷哀求援助 上主 — 萬軍的統帥講： 恁著知死！ 去倩許個唱哀歌的婦仁人來， 去招許個𠢕哭的查某人來。 |
| 9:18 | 人民講：
𪜶著趕緊來，給咱唱哀歌， 互咱目屎直直流， 互咱的目屎掊𣍐離。 |
| 9:19 | 聽咧，錫安傳出哭聲：
阮竟然即呢落魄！ 阮有夠見笑！ 阮煞著放落此塊土地！ 阮的厝煞互人拆毀！ |
| 9:20 | 婦仁人啊，著聽上主的聲，
聽趁伊的話； 著教恁的查某子哀哭， 教恁的查某伴唱哀歌。 |
| 9:21 | 死亡會對窗仔入來，
入來咱的堡壘， 佇街路殺害咱的囝仔， 佇廣場刣死咱的少年人。 |
| 9:22 | 上主命令我給恁講：
人的身屍會倒佇野外親像糞埽， 親像收割的人落落來的麥穗，無人拾。 |
| 9:23 | 上主講：
智慧的人毋通誇口家己的智慧； 勇猛的人毋通誇口伊的氣力； 好額人毋通誇口伊的財富。 |
| 9:24 | 人若欲誇口，
著誇口伊識我，承認我是上主； 我愛佇世間施慈愛、公義，及公平。 上主按呢宣布。 |
| 9:25 | 上主講：「恁著注意，時日一下到，我欲刑罰干焦肉體接受割禮的人， |
| 9:26 | 就是埃及人、猶大人、以東人、亞捫人、摩押人，以及所有住佇曠野，剃鬢邊的人；諸個民族攏無受割禮，以色列全體人民的心嘛無受割禮。」 |